Muğanlı-İsmayıllı yolunda nəqliyyatın hərəkəti çətinləşib
Muğanlı-İsmayıllı yolunda nəqliyyatın hərəkəti çətinləşib
Ötən gecə İsmayıllı rayonuna yağan güclü qar Muğanlı-İsmayıllı yolunda nəqliyyatın hərəkətində müəyyən çətinliklər yaradıb.
Oxu.Az APA-ya istinadən xəbər verir ki, yola təxminən 10 santimetr hündürlüyündə düşən qar və dumanlı hava şəraiti gecə saatlarında İsmayıllı-Muğanlı dolaylarında hərəkət üçün təhlükəli vəziyyət yaradıb, mövsümə hazır olmayan bəzi minik avtomobilləri yolda qalıb.
Bu gün səhər saatlarında 9 saylı “İsmayıllı Yol İstismar” MMC-nin canlı qüvvəsi və ağır texnikaları əraziyə cəlb olunub, yollar qardan təmizlənib, nəqliyyatın hərəkəti bərpa olunub.
Hazırda İsmayıllı-Muğanlı yolunda nəqliyyatın hərəkəti bərpa olunsa da, mütəxəssislər bu gün axşam saatlarından başlayaraq yolun yenidən buz bağlayacağı və hərəkət üçün təhlükəli vəziyyət yaranacağı barədə xəbərdarlıq edir, sürücülərə alternativ yollardan istifadə etməyi məsləhət görürlər.
Qeyd edək ki, Ağsu aşırımına da qar yağıb, Şamaxı rayonu ərazisindəki dolaylar qar və buzdan təmizlənib.
A.M.