Yol polisi sürücüyə gülünc “fotofakt” göndərdi – FOTO
Yol polisi sürücüyə gülünc “fotofakt” göndərdi – FOTO
Yol polisinin sürücünün ünvanına qayda pozuntusu ilə bağlı göndərdiyi protokol təəccüb yaradıb.
Oxu.Az xəbər verir ki, Teymur adlı şikayətçi criminal.az saytına bildirib ki, aprelin 19-da yaşadığı ünvana inzibati qayda pozuntusu törətməyi barədə protokol gəlib.
Şikayətçinin sözlərinə görə, protokola çox gülünc formalı “fotofakt” əlavə olunub: “Burada hansısa faktdan əsla söhbət gedə bilməz. Mənim qayda pozmadığım kimi bir iddiam yoxdur. Ola bilər ki, avtomobil sürərkən diqqətim yayınıb və yol nişanını görməmişəm. Amma bunu sübuta yetirmək, ilk növbədə, məni qayda pozmaqda ittiham edən tərəfin məsuliyyətidir. Bu protokolda nə avtomobilin görüntüsü var, nə nömrəsi var, nə də ki başqa bir sübut. Düşünürəm ki, belə bir protokol göndərilməsi vətəndaşa qarşı ən azından hörmətsizlikdir”.
Bakı Şəhər Yol Polis İdarəsinin bölmə rəisi Vaqif Əsədov bildirdi ki, ola bilər həmin foto günün qaranlıq vaxtı çəkilib. Bölmə rəisinin sözlərinə görə, əgər şübhə doğuran fakt varsa, sürücü məktub göndərilən yol polis şöbəsinə təqdim etsin: “Sürücü hesab edə bilər ki, protokolda yanlışlıq var, kustar üsulla hazırlana bilər, foto printerdən pis çıxa bilər. Bütün hallarda bu məsələyə aydınlıq gətirilməlidir”.
A.M.