Polis qardaşını öldürən hüquqşünas bağışlanmaq istəyir
Polis qardaşını öldürən hüquqşünas bağışlanmaq istəyir
Bakıda qardaşını xüsusi amansızlıqla öldürməkdə ittiham olunan Əli Əliyevin barəsində olan hökmdən verilən apellyasiya şikayəti üzrə məhkəmə prosesi başlayıb.
Oxu.Az xəbər verir ki, Bakı Apellyasiya Məhkəməsində hakim Elmar Rəhimovun sədrliyi ilə baş tutan ilkin baxış iclasında təqsirləndirilən şəxsin anket məlumatları dəqiqləşdirilib.
Məhkəmə baxışı dekabrın 10-na təyin olunub.
Bakı Ağır Cinayətlər Məhkəməsinin hökmü ilə Əli Əliyev 17 il müddətinə azadlıqdan məhrum edilib.
İttihama görə, qətl hadisəsi ötən ilin avqustunda Binəqədi rayonu, 9-cu mikrorayon, Mir Cəlal küçəsi 85-də yerləşən binada baş verib. Əli Əliyev qardaşı Murad Əliyevi bıçaqlayaraq öldürüb.
1990-cı il təvəllüdlü Əli Əliyev Moskva Dövlət Universitetinin Hüquq fakültəsini bitirib. Onun bıçaqlayaraq öldürdüyü qardaşı, 1983-cü il təvəllüdlü Murad Əliyev isə kunq-fu idman növü üzrə peşəkar idmançı, Çevik Polis Alayında polis serjantı imiş.
Hadisənin ilkin təfərrüatına görə, qardaşlar televizora baxmağa görə əvvəlcə mübahisə ediblər və daha sonra əlbəyaxa dava yaranıb.
Əli Əliyev mətbəx bıçağını götürərək qardaşına hücum edib və çoxsaylı zərbələr endirib. Əli Əliyev hadisədən sonra evdən qaçıb. O, polis əməkdaşları tərəfindən həbs edilib.
Etibar Məmmədov
www.oxu.az
Oxu.Az yeniləndi!