“Kəlağayım-əlvan örpəyim...” sərgisi - FOTO
“Kəlağayım-əlvan örpəyim...” sərgisi - FOTO
Sərgi bir həftə davam edəcək.
Dekabrın 18-də Azərbaycan Xalça Muzeyində zərif sənət nümunəsi olan kəlağayımızı qürurla nümayiş etdirmək məqsədilə “Kəlağayım-əlvan örpəyim...” sərgisi açılıb.
Oxu.Az AzərTAc-a istinadla xəbər verir ki, tədbirə TÜRKSOY-a üzv ölkələrin UNESCO üzrə Milli komissiyalarının 5-ci iclasının iştirakçıları da qatılıb.
Mədəniyyət və turizm nazirinin müavini Sevda Məmmədəliyeva qonaqları salamlayaraq Azərbaycan Xalça Muzeyi və burada nümayiş olunan eksponatlar barədə məlumat verib. Xalça sənətinin bizim maddi və mədəni sərvətimiz olduğunu qeyd edərək bu sənətin 2010-cu ildə Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın təşəbbüsü ilə UNESCO-nun Qeyri-maddi mədəni irs siyahısına daxil edildiyini diqqətə çatdırıb.
Nazir müavini bildirib ki, kəlağayı sənəti ilə bağlı nümunələrin təqdimatının bu gün keçirilməsi təsadüfi deyil. Belə ki, noyabrın 24-dən 28-dək keçirilən UNESCO-nun Qeyri-maddi mədəni irs üzrə Hökumətlərarası Komitəsinin 9-cu iclasında Azərbaycanın qədim və zəngin xalq sənətkarlığının daha bir nümunəsi olan kəlağayı “Kəlağayı simvolizmi və ənənəvi sənəti” adı ilə UNESCO-nun Qeyri-maddi mədəni irs üzrə Reprezentativ siyahısına daxil edilib.
Heydər Əliyev Fondu, Mədəniyyət və Turizm Nazirliyi, Azərbaycanın UNESCO yanında daimi nümayəndəliyi, UNESCO üzrə Azərbaycan Respublikası Milli Komissiyasının birgə fəaliyyəti nəticəsində Komitə kəlağayı sənətinin Azərbaycan xalqının milli-mənəvi dəyərləri sistemində və adət - ənənələrimizdə mühüm mədəniyyət nümunəsi olduğunu beynəlxalq səviyyədə təsdiqlədi.
Xalqımızın başını uca tutan, dünya səyyahlarının diqqətini cəlb edən, alimlərin əsərlərində bəhs olunan Azərbaycan ipəyi uzun illərdən bəri ölkəmizə həm maddi, həm də mənəvi fayda verib.
Vurğulanıb ki, Azərbaycanın bir çox regionlarında ipək sənəti mövcuddur. Bu sərgidə regionların müxtəlif ornamentli kəlağayıları, həmçinin müasir kəlağayılar nümayiş olunur.
S.Məmmədəliyeva qonaqları həm sərgi ilə, həm də Xalça Muzeyinin daimi ekspozisiyası ilə tanış olmağa dəvət edib.
Sərgidə muzeyin “Parça, tikmə, geyim” kolleksiyasından XIX əsrə aid kəlağayılar, “Şəki İpək” Açıq Səhmdar Cəmiyyətinin, İsmayıllı rayonunun Basqal qəsəbəsindən Rəna İbrahimbəyovanın, rəssam Hüseyn Həsənovun kəlağayılarından ibarət “Yol” adlı kompozisiyası və eləcədə gənc dizayner Mənzər Hacıyevanın müəllifi olduğu kəlağayılar nümayiş olunur.
Sərgi bir həftə davam edəcək.
