27 
Okt
2016
13:33
13
45
1338
Virtual karabakh

Natiq Əliyevdən OPEK-in Vyana toplantısı ilə bağlı bəyanat

Energetika naziri Natiq Əliyev oktyabrın 29-da Vyanada keçiriləcək Neft İxrac edən Ölkələr Təşkilatına (OPEK) üzv və qeyri-OPEK ölkələrinin Əlcəzair sazişinin həyata keçirilməsi üzrə Yüksək səviyyəli Komitəsinin iclasında iştirak edəcək.

Bu barədə nazirlikdən Oxu.Az-a bildirilib. 

Toplantıya Azərbaycanla yanaşı, neft hasil edən qeyri-OPEK dövlətlərindən Rusiya, Qazaxıstan, Bəhreyn, Boliviya, Braziliya, Bruney, Kanada, Misir, Kolumbiya, Norveç, Malayziya, Oman, Meksika, Trinidad və Tobaqo da dəvət edilib.

İclasın gündəliyinə dünya neft bazarının qısa müddətli inkişafı ilə əlaqədar təqdimat və müzakirələr, OPEK-in qərarının icrasına qeyri-üzv ölkələrin qoşulması ilə bağlı neft istehsal edən OPEK-ə üzv və qeyri-üzv dövlətlərin nümayəndələri ilə müzakirələr, eləcə də tədbir çərçivəsində məsləhətləşmələrin aparılması daxildir. 

Görüşlə əlaqədar Energetika naziri N.Əliyev bildirib ki, Azərbaycan dünyanın neft bazarının tənzimlənməsi, sabitləşdirilməsi və neftin qiymətinin qalxması üçün irəli sürülən təşəbbüsə qoşulur və razılaşmanın əldə olunması üçün öz töhfəsini verməyə hazırdır:

“Düşünmürəm ki, kartelə üzv olmayan dövlətlər neft hasilatının məhdudlaşdırılması ilə bağlı yekun qərarın qəbuluna etiraz etsinlər. Burada həlli vacib məsələ OPEK üzvləri, xüsusilə də İran, Liviya, Nigeriya və Səudiyyə Ərəbistanı kimi dövlətlər arasında ziddiyyətlərin aradan qaldırılması, ümumi razılığın əldə olunmasıdır”.

Natiq Əliyev onu da əlavə edib ki, Azərbaycanın öz neft hasilatını və ixracını artırmayacağı ilə bağlı mövqeyi  iclas çərçivəsində nəzərdə tutulan ayrı-ayrı görüşlərdə də bir daha bəyan ediləcək.

Xatırladaq ki, sentyabrın 28-də Əlcəzairdə keçirilən qeyri-formal görüşdə OPEK üzvləri sutkalıq neft hasilatını 32,5-33 mln. barrel səviyyəsində dondurmağı razılaşdırıb. Yekun qərarın isə noyabrın 30-da Vyanada keçiriləcək rəsmi görüşdə veriləcəyi gözlənilir. 

U.A.
www.oxu.az

Система OrphusMətndə səhv var? Onu siçanla seçin və Ctrl+Ent düyməsini basın.

Digər İqtisadiyyat xəbərləri