Siqaretlərin qiyməti bahalaşa bilər - EKSPERT ŞƏRHİ

Bakıda tütün məmulatların nağd pulla topdan satışı qadağan olunub. Siqareti ancaq bank köçürməsi (və yaxud VÖEN-ə bağlı kart hesabı - red.) ilə almaq mümkündür. Topdan satışla məşğul olanlar siqareti plastik kartla və ya öncədən hesaba köçürmə yolu ilə sata biləcəklər. Pərakəndə ticarətlə məşğul olanların çoxunun nə kartı var, nə də hesabları. Bir sözlə, siqaretin pulu öncədən ödənildikdən sonra mağazalara siqaret göndəriləcək. Bundan istifadə edən bəzi “işbazlar” isə siqaretin qiymətini süni şəkildə artırırlar.

Ekseprtlər isə hesab edirlər ki, bu problemlər müvəqqəti hal daşıyır və yaxın vaxt ərzində öz yoluna düşəcək. 

Oxu.Az xəbər verir ki, iqtisadçı-ekspert Samir Əliyev Ölkə.Az-a bildirib ki, əslində tütün məmulatlarının nağdsız ödənişlərlə ticarəti yaxşı haldır. Onun fikrincə, bu zaman qeyri-qanuni dövriyyənin qarşısı alınacaq.

“Məqsəd tütün məmulatlarının uçot sisteminin təkmilləşdirilməsidir. Bu sahədə boşluqlar var. Problemlər hələ də mövcuddur. Mağazalar satış dövriyyəsini gizlədirlər. Bu səbəbdən də nağdsız dövriyyənin artırılması konteksində addımlar atılır. Nağdsız dövriyyənin artırılmasının əsas səbəbi ölkədə qeyri-rəsmi dövriyyənin aradan qalxması, şəffaflığın artırılması, ümumilkdə maliyyə axınına təsir etməkdir”, - deyə S. Əliyev bildirib.

Ekspertin fikrincə, tütün məmulatlarının nağdsız ödənişlərlə ticarəti siqaretlərin qiymətinə təsir etməyəcək:

“Bu sistemin həyata keçirilməsi zaman bəzi dükanlar, xüsusilə də kənd yerlərində olan mağazalar siqaret satışını dayandıra bilərlər. Lakin bununla bərabər həmin obyektlər gizlicə siqaret satışı ilə məşğul ola bilərlər. Bu zaman da siqaretlərin qiymətində süni artım baş verə bilər. Lakin ümumilikdə bu zaman siqaretlərin bahalaşmasına heç bir səbəb olmayacaq”.

S.Əliyev deyir ki, siqaretlərin çoxu xaricdən gətirildiyi və birbaşa dolların dəyərindən asılı olduğu üçün, manat ucuzlaşdıqca, onların qiyməti bahalaşacaq.

“Siqaretin bahalaşması davam edəcək. Çünki manat ucuzlaşdıqca, siqaretlər də bahalaşcaq”, - deyə S.Əliyev bildirib.

Qeyd edək ki, Azərbaycan prezidenti İlham Əliyevin 2015-ci il 7 dekabr tarixli 700 nömrəli fərmanı ilə təsdiq edilmiş “Aksiz markası ilə markalanmalı olan malların Azərbaycan Respublikasının ərazisində dövriyyəsinin tənzimlənməsi Qaydaları”nda dəyişiklik edilməsi haqqında 24 dekabr 2016-cı il tarixli fərmanına əsasən 1 yanvar 2017-ci ildən içməli spirt, spirtli içkilərin bütün növləri, pivə (alkoqolsuz pivə istisna olmaqla) və pivə tərkibli digər içkilər və tütün məmulatların nağd pulla topdan satışı qəti qadağan olunub. Bu tələblərdən hər hansı birini pozan hüquqi və fiziki şəxs İnzibati Xətalar Məcəlləsində və Cinayət Məcəlləsində nəzərdə tutulmuş hallarda məsuliyyət daşıyacaq.

S.B.
www.oxu.az