Nazir: Türkiyə Azərbaycana gömrük güzəştləri təqdim edəcək
Nazir: Türkiyə Azərbaycana gömrük güzəştləri təqdim edəcək
“Türkiyə Azərbaycanın Naxçıvan Muxtar Respublikasında istehsal olunan məhsulların idxalçılarını gömrük rüsumlarının ödənişindən azad etməyə hazırdır”.
Oxu.Az xəbər verir ki, bunu Trend-ə Türkiyənin Ərzaq, kənd təsərrüfatı və heyvandarlıq naziri Faruk Çelik bildirib.
Onun sözlərinə görə, Türkiyənin şərq vilayətlərinin tələbatını təmin etmək üçün sərhədyanı ticarət çərçivəsində qonşu ölkələrdən bir sıra ərzaq məhsulları idxal oluna bilər: “Bununla belə, Türkiyə Ümumdünya Ticarət Tәşkilatının qaydalarına uyğun fəaliyyət göstərməlidir”.
F.Çelik qeyd edib ki, Türkiyə Nazirlər Kabineti ötən il “Sərhədyanı ticarətin nizamlanması haqqında” qərar qəbul edib. Bu qərara əsasən, Naxçıvandan ölkənin sərhədyanı vilayətlərinə idxal müəyyən edilmiş limit çərçivəsində həyata keçiriləcək:
“Bu qərarla əlaqədar olaraq, Naxçıvandan idxal olunan mallara münasibətdə gömrük rüsumunun sıfır dərəcəsi tətbiq ediləcək. Naxçıvan Türkiyə ilə Azərbaycan arasında “birləşdirici halqa”dır. Naxçıvan coğrafi mövqeyinə görə strateji əhəmiyyət kəsb edir”.
Qeyd edək ki, bundan əvvəl Azərbaycan iqtisadiyyat nazirinin müavini Sahil Babayev Naxçıvan Muxtar Respublikasında istehsal olunan malların tədarükü zamanı gömrük güzəştləri əldə etmək üçün Türkiyə ilə danışıqlar aparıldığını bildirmişdi.
U.A.
www.oxu.az