“AmCham”ın yeni prezidenti məlum oldu

Bu gün Azərbaycanda Amerika Ticarət Palatasının (“AmCham”) illik iclası çərçivəsində Palatanın prezidenti və Direktorlar Şurasının yeni üzvləri seçilib. 

Oxu.Az Fins.az-a istinadən xəbər verir ki, prezident seçkilərinin nəticəsinə əsasən, Nuran Kərimov Azərbaycanda “AmCham”ın yeni prezidenti seçilib.

N.Kərimov buna qədər “Deloitte Azərbaycan” şirkətinin idarəedici partnyoru vəzifəsində çalışıb.
Direktorlar Şurasına gəlincə, 10 yerdən 6-sı vakant “Baker McKenzie”nin idarəedici partnyoru Gündüz Kərimovun təlimatından sonra seçkilər baş tutub və nəticədə Direktorlar Şurasının altı yeni üzvü seçilib:

Vüqar Əliyev - KPMG Azərbaycan şirkətinin idarəedici partnyoru;

Bəxtiyar Aslanbəyli - BP şirkətinin Azərbaycan, Gürcüstan və Türkiyə regionunda xarici əlaqələr və strategiya üzrə vitse-prezidenti;

Taleh Kazımov - “PAŞA Bank”ın İdarə Heyətinin sədri və icraçı direktoru;

Nərgiz Nəsrullayeva - “Müdüroğlu - Landmark” biznes mərkəzinin biznes əməliyyatları üzrə direktoru;

Əsəd Şirinov - “Coca-Cola” şirkətinin Qafqaz regionu üzrə meneceri;

İlqar Vəliyev - “Ernst & Young Azərbaycan” şirkətinin idarəedici partnyoru.

Qeyd edək ki, 1996-cı ildən Azərbaycanda fəaliyyət göstərən “AmCham” ölkədə xarici investisiyaların 80%-ni təmsil edən 260 üzv şirkətdən ibarətdir və hazırda dövlət və özəl sektor arasında körpü rolunu oynayaraq aidiyyəti dövlət qurumları ilə davamlı konstruktiv və nəticə-əsaslı dialoqlar aparır. 

Palata üzv şirkətlərin biznes maraqlarını təşviq edir və Azərbaycanın biznes iqliminin inkişafında xüsusi rol oynayır.

U.A.
www.oxu.az