Sığorta şirkətlərinin Palataya ödəyəcəyi məbləğlər – SİYAHI

“Azərbaycanda fəaliyyət göstərən sığorta şirkətlərinin bu il Maliyyə Bazarlarına Nəzarət Palatasına (MBNP) ödəyəcəyi məbləğ onların ötən ilin yekunundakı topladıqları sığorta haqları əsasında müəyyən ediləcək”.

Oxu.Az “Report”a istinadən xəbər verir ki, bu barədə Palatanın Direktorlar Şurası sədrinin müşaviri Rüfət Abbasov məlumat verib.

Xatırladaq ki, ötən gün, aprelin 19-da qüvvəyə minmiş qaydalara görə, qeyri-həyat sığortaçıları illik daxilolmaları 30 mln. manatdan çox olduqda bunun 30 mln. manatdan artıq hissəsinin 1%-i qədər və əlavə olaraq 180 min manat, illik daxilolmaları 10-30 mln. manat olduqda bunun 10 mln. manatdan artıq hissəsinin 0,7%-i qədər və əlaqə olaraq 40 min manat, illik daxilolmaları 10 mln. manata qədər olduqda isə bunun 0,4%-i qədər Palataya illik haqq ödəməlidir.

Həyat sığortaçılarının isə ödəyəcəyi haqqın məbləği illik daxilolmaların məbləği 30 mln. manatdan çox olduqda bunun 30 mln. manatdan artıq hissəsinin 1,1%-i qədər və əlavə olaraq 198 min manat, illik daxilolmaları 10-30 mln. manat olduqda bunun 10 mln. manatdan artıq hissəsinin 0,77%-i qədər və əlaqə olaraq 44 min manat, illik daxilolmalar 10 mln. manata qədər olduqda isə bunun 0,44%-i qədərdir.

Son nəticədə 21 yerli sığorta şirkəti MBNP-ya illik 3 mln. 452 min manat haqq ödəməlidir. Amma qaydalar 19 aprel 2017-ci ildən qüvvəyə mindiyi üçün sığortaçılar bu ilin qalan 8 ayının pulunu Palataya ödəyəcək. Bu isə təxminən 2 mln. 3 min manat təşkil edir.

U.A.
www.oxu.az