17 
İyl
2017
15:19
11
93
2080
Virtual karabakh

“Beynəlxalq Bank”a kredit borcu olan müəssisə 37 milyon manata satılır

“Azərbaycan Beynəlxalq Bankı”na kredit borcu olduğuna görə girov götürülmüş “Bakı Fındıq Emalı” müəssisəsi satışa çıxarılıb. Müəssisəni “Beynəlxalq Bank”ın toksit aktivlərini idarə edən “Azərkredit” hərraca çıxarıb.

Oxu.Az Marja-ya istinadən  xəbər verir ki, hərrac yolu ilə satılacaq müəsisəsinin satış qiyməti 37 milyon 744 min manatdır.

Hərracı udmuş şəxs alış qiymətindəki məbləği sifarişçi təşkilatın hesabına köçürməlidir. Açıq hərrac 15 Avqust 2017-ci il tarixində keçiriləcəkdir.

“Bakı Fındıq Emalı” müəssisəsi (“BakFem” MMC) 1996-cı ildən fəaliyyət göstərir və Azərbaycanda fındıq emalı ilə məşğul olan ən iri müəssisələrdən biridir.

“BakFem”in direktoru işləmiş Azad Cavadov məhkəmədə bildirib ki, müəssisə “Beynəlxalq Bank”dan ümumilikdə 60 milyon manat kredit götürüb: “Kredit istehsalın genişlənməsinə sərf olunub, “Beynəlxalq Bank” da bu işə nəzarət edib. Burada heç bir mənimsəmə yoxdur. Müqaviləyə əsasən, borc ödənilməzsə, bütün hallarda müəssisə bankın girovluğunda idi. Zavod sonra  “Aqrar Kredit” QSC-nin nəzarətinə keçib”.

Bakı şəhəri, Bakıxanov qəsəbəsində yerləşən müəssisənin  tərkibində 4 mərtəbəli ofis binası, fındıq çeşidləmə, fındıq pasta istehsalı, fındıq qovurması, qablaşdırma, anbar sahəsi və digər inzibati sahələr vardır.

“Bakfem”in mövsüm ərzində tam fındıq emalı üçün nəzərdə tutulmuş 1000 ton  istehsal gücünə malik, Türkiyə və Belçikada istehsal olunmuş istehsal xətləri və avadanlıqları mövcuddur. Müasir  avadanlıqlarla təchiz olunan sınaq laboratoriyası vasitəsilə  xammal və hazır məhsulun keyfiyyətinə nəzarət həyata keçirilir.  

Müəssisənin Xaçmaz, Qusar, Oğuz, Qax, Zaqatala və Balakəndə 1681 hektar torpaq sahəsi, bölgələrdə 7 fındıq emalı sexi var.

Cəmiyyətin ümumi istehsal gücü: minimum 5.000 ton qabıqlı fındıq xammalını emal edərək ondan 1800 - 2000 ton fındıq ləpəsi və digər fındıq məhsulları (hazır məhsul çıxışı 36-40% civarında mövsümdən asılı olaraq dəyişə bilir) əldə oluna bilər.Cəmiyyət İSO 9001-2008 və İSO 22000 - 2005 beynəlxalq standartlara uyğun sertifikat sahibdir. İstehsal olunmuş məhsullar yerli və xarici (Rusiya, Ukrayna, İtaliya, Almaniya) bazarlarda satılır.

L.Ə.

www.oxu.az