Bakı-Tbilisi-Qars dəmir yolunun inşası tamamlanmaq üzrədir
Bakı-Tbilisi-Qars dəmir yolunun inşası tamamlanmaq üzrədir
İlk qatarın bu ilin sonunadək xəttə buraxılması nəzərdə tutulub.
Bakı-Tbilisi-Qars (BTQ) dəmir yolunun inşasının tamamlanması üçün ciddi problem qalmayıb.
Oxu.Az AzərTAc-a istinadən xəbər verir ki, bunu avqustun 13-də Gürcüstanın Baş nazirinin müavini, iqtisadiyyat və davamlı inkişaf naziri Georgi Kvirikaşvili deyib.
Azərbaycan və Gürcüstan nümayəndə heyətlərinin iştirakı ilə BTQ dəmir yolu layihəsinin Əlaqələndirmə Şurasının Bakıda keçirilən 20-ci iclasında çıxış edən G.Kvirikaşvili layihənin əhəmiyyətini vurğulayaraq bildirib ki, ölkəsi bu layihəyə xüsusi önəm verir.
“Qarşımızda duran məsələlərin operativ həlli üçün bu cür görüşlərin keçirilməsi müsbət haldır. Ümid edirəm ki, uğurlu əməkdaşlığımız bundan sonra da xalqlarımızın rifahına xidmət edəcək”, - deyə G.Kvirikaşvili vurğulayıb.
Qeyd edək ki, BTQ dəmir yolunda ilk qatarın bu ilin sonunadək xəttə buraxılması,
2015-ci ildən isə yolun tam istismara verilməsi nəzərdə tutulur. Bu dəmir yolu xətti üzrə beynəlxalq layihənin həyata keçirilməsi və Bosfor boğazında dəmir yolu tunelinin inşası Transavropa və Transasiya dəmir yolu şəbəkələrinin birləşdirilməsinə, yük və sərnişinlərin Azərbaycan, Gürcüstan və Türkiyə ərazilərindən keçməklə Avropa və Asiyaya birbaşa çıxışına imkan verəcək.