Bazarda qızıla olan tələbat azalır
Bazarda qızıla olan tələbat azalır
“Gözlənilən idi”.
Dünya bazarında qızıl son 4 ildə ən aşağı qiymətə təklif edilir. Son 1 ildə 4 faiz dəyər itirən sözügedən qiymətli metal ötən 6 ayda 8 faizə yaxın ucuzlaşıb. Qramı 38, unsiyası 1200 dollara təklif edilən qızıl 5 il öncəki qiymətinədək geriləyib.
Oxu.Az xəbər verir ki, bunu iqtisadçı-ekspert Vüqar Bayramov deyib.
Ekspertin sözlərinə görə, əslində, 2008-ci ildə müşahidə edilən qlobal maliyyə böhranından sonra qiymətində artım qeydə alınan qızılın 2013-cü ildən başlayaraq ciddi dəyər itirəcəyi öncədən proqnozlaşdırılırdı.
“Böhran qızıla olan tələbatı artırsa da sonrakı mərhələ bu qiymətli metala olan tələbin azalması iqtisadi qanunlara uyğundur. Belə ki, 2008 və 2009-cu illərdə böhranın nəticələrini və eləcə də müddətini proqnozlaşdırmaqda çətinlik çəkən investorlar o zaman öz pullarını qızılda saxlamağa üstünlük verdilər. Qızılın qiymətinin ucuzlaşmasına təsir edən digər amil isə bu qiymətli metala zinət əşyası kimi marağın azalmasıdır. Hazırda isə dünya bazarında inflyasiya minimuma enib, səhmlərin qiymətləri isə artmağa başlayıb və dollar güclənir. Bütün bunlar isə qızılın investisiya baxımından cəlbediciliyini azaldır. Eyni zamanda, 2008 və 2009-cu illərdə ehtiyatlarının bir qismini qızıla çevirən bir sıra ölkələr o cümlədən Çin və Hindistanda qızıl külçələr və sikkələr 2013-cü ildən başlayaraq bazara çıxarıblar ki, bu da qızıl təklifinin artmasına səbəb olub. Digər tərəfdən, qızıl bazarında spekulyativ oyunlar da kifayət qədər yüksəkdir və bu da qiymətlərin dəyişməsini şərtləndirir”.
Vüqar Bayramov hesab edir ki, azalma tendensiyası 2014-cü ilin son aylarında da davam edəcək.
“Bir sıra inkişaf etmiş ölkələrdə xüsusən də ABŞ-da real sektorda gəlirlik normasının yüksəlməsi, investorların öz vəsaitlərini qızıl bazarından çəkməsinə səbəb olub. Qızıl bazarında investor aktivliyinin azalması qiymətli əşyanın dəyərinin aşağı düşməsinə səbəb olub”.
Ekspert o cümlədən insanların qızıla olan yanaşmasını da ortaya qoyub.
“Azərbaycanda da son bir ildə qızılın qiymətinin 5 faiz aşağı düşməsinə dünya bazarındakı dəyişikliklər ilə yanaşı qızılın yığım vasitəsi kimi praktik olaraq istifadə olunmamasıdır. Əvvəllər vəsaitin yığım vasitəsi kimi qızıla cəlb edilməsi rentabelli idisə, indi rentabelli deyil. Çünki qızılın alış və satış qiymətləri arasında kəskin fərq var. Bundan başqa, dünyada və Azərbaycanda qızıla dəb olaraq maraq azalıb. Əvvəllər qadınlar bahalı və ağır qızıllardan istifadə edirdisə, bu gün az çəkili qızıldan istifadə halları artıb. Bazardakı durğunluq bu ilin sonunadək davam edəcək. Başqa tərəfdən, Məhərrəm ayının başlaması ilə bağlı olaraq Azərbaycanda toy və şənlik mövsümünə ara verilib. Bütövlükdə, yaxın zamanlarda daxili bazarda qızılın qiymətində bahalaşma proqnozlaşdırılmır”.