Rusiya rublunun ucuzlaşması Azərbaycana necə təsir göstərəcək? – RƏY

Qarşılıqlı ticarət dövriyyəsində nəzərəçarpan azalma var.

Rusiya rublu yenidən dollara nisbətən ciddi dəyər itirməkdədir. Bu ilin əvvələrində “özünə gəlməyə” çalışan Şimal qonşumuzun milli valyutası cəmi 6 ay duruş gətirə bildi. İranın Qərblə münasibətlərini istiləşməsi sadəcə dünya bazar silkələmədi, həmçinin Moskvada havanın dərəcəsini qaldırdı. 

Oxu.Az xəbər verir ki, bu sözləri iqtisadçı-alim Vüqar Bayramov deyib. 

Onun sözlərinə görə, son bir il ərzində rublun məzənnəsi 55%-dən çox ucuzlaşıb:

“Yay mövsumundən əvvəl 1 dollar almaq üçün 48 rubl təklif edildiyi halda indi ruslar 63 rubllarından keçməlidirlər. Son bir ayda 14% dəyər itirən rubl dollar qarşısında son həftə 7% geriləyib. Bütövlükdə, son bir ildə rubl məzənnəsi 55%-dən çox ucuzlaşıb”.

V. Bayramov bildirib ki, sözügedən ucuzlaşma ilə əlaqədar olaraq, Azərbaycanla bu ölkə arasında ticarət dövriyyəsində də azalma baş verib:

“Rusiya ölkəmizin qeyri-neft ixracatında əsas ticarət və iqtisadi tərəfdaşımız olduğunu nəzərə alsaq rublun dəyərsizləşməsi bu ölkəyə ixrac potensialımıza təsir göstərməkdədir. Rublun məzənnəsindəki azalmalar artıq 2014-cü ildə Rusiya Azərbaycan ticarət dövriyyəsində özünü göstərdi.

Belə ki, ötən ilin yekunlarında iki ölkə arasındakı ticarət dövriyyəsi rəsmi statistikada əvvəlki ildəki 2 milyard 583 milyon dollardan 1 milyard 954 milyon dollaradək azaldı. Bu özünu Rusiyaya ixracatımızda da göstərdi. Şimal qonşumuza 2013- cü ildə 1 milyard 77 milyon dollarlıq mal göndərdiyimiz halda bu göstərici ötən il 640 milyon dollar olub”.

Bayramov onu da əlavə edib ki, rublun qara günləri hələlik Azərbaycan iqtisadiyyatına hiss edilən dərəcədə təsir göstərməyəcək:

“Digər tərəfdən Rusiyada rublun dollara nisbətən məzənnədən düşməsi rublun manata nisbətən kursunu da azalmasına gətirib çıxarır. Yəni manat da rubla nisbətən möhkəmlənir. Bu, Rusiyaya məhsul ixrac edən azərbaycanlı yerli iş adamlarının ixrac qabiliyyətini məhdudlaşdırır.

Faktiki olaraq Azərbaycan məhsullarının Rusiyada bahalaşmasına gətirib çıxarır. Bununla yanaşı, Azərbaycan fermerlərinin istehsal etdiyi tərəvəz məhsullarının Rusiya bazarında müqayisəli üstünlüyə malik olmasını nəzərə alsaq rublun qara günləri hələlik Azərbaycan iqtisadiyyatına hiss edilən təsir göstərməyəcək. Bununla yanaşı, rublun dəyərsizləşməsi Azərbaycanın Rusiyaya ixracatına orta müddətli dövrdə təsir göstərə bilər”.

İqtisadçı həmçinin növbəti aylarda tikinti materiallarının qiymətinin ucuzlaşacağını da istisna etmir:

“Məzənnənin aşağı düşməsi Azərbaycana göndərilən Rusiya mallarının qiymətlərinə artıq təsir göstərməkdədir. Növbəti aylarda biz bunu daha aydın şəkildə görəcəyik. Xüsusən də Rusiya istehsalı olan bəzi tikinti materiallarının qiymətində endirimlərin olacağı istisna edilmir.

Rublun məzənnəsi aşağı düşdükdən sonra isə bu ölkədə yaşayan həmyerlilərimizin də biznesində durğunluq müşahidə ediləcək. Bu baxımdan onların Azərbaycanda göndərdikləri vəsaitlərin məbləğində azalma müşahidə ediləcək. Bütövlükdə 2015-cü ildə azərbaycanlıların Rusiyadan göndərdikləri vəsaitin məbləğinin 30% azalacağı proqnozlaşdırılır”.

Ülviyyə R. Əli
www.oxu.az