Nadir Qafarzadə polislərlə əlbəyaxa oldu
Nadir Qafarzadə polislərlə əlbəyaxa oldu
Müğənni polis idarəsinə aparılıb.
Tanınmış müğənni Nadir Qafarzadə ilə polislər arasında qarşıdurma olub.
Oxu.Az xəbər verir ki, lent.az-ın hüquq-mühafizə orqanlarından əldə etdiyi məlumata görə, müğənni Sabunçu rayonu Maştağa qəsəbəsi ərazisindəki 1 saylı Ruhi Əsəb Dispanserində xidmət aparan mühafizə polisinin əməkdaşları ilə dalaşıb.
Bəlli olmayan səbəblərdən müğənni ilə asayiş keşikçiləri arasında narazılıq yaranıb. Bu zaman N.Qafarzadə polislərə qarşı kobudluq edib, onları söyüb. Dərhal hadisə yerinə Sabunçu Rayon Polis İdarəsi, 14-cü Polis Bölməsinin əməkdaşları gəliblər. Müğənni bölməyə aparılıb və izahatı alındıqdan sonra sərbəst buraxılıb.
Bildirilir ki, əvvəlcə tanınmış müğənniyə Sabunçu Rayon Polis İdarəsində Cinayət Məcəlləsinin “xuliqanlıq” maddəsi ilə iş başlanılıb. Lakin çox keçmədən cinayət işinin istintaqı dayandırılıb və işə xitam verilib. Xuliqanlıq əməli ilə bağlı materiallar isə 14-cü polis bölməsinin təhqiqat şöbəsinə göndərilib. Hazırda müğənninin əməli ilə bağlı polis bölməsində araşdırmalar aparılır.
Məsələ ilə bağlı Nadir Qafarzadə danışıb. O, əvvəlcə Maştağada bağ evinin olduğunu desə də, sonradan mətləbə gəlib: “Qardaşım Maştağadakı ruhi-əsəb xəstəxanasında müalicə olunur. Ona görə ora getmişdim. Mən azadlıqdayam. Başqa nəsə öyrənmək istəyirsinizsə, polislə danışın”.
Qeyd edək ki, Nadir Qafarzadənin qardaşı Qarabağ müharibəsində başından ağır xəsarət alıb və uzun müddətdir ki, ruhi-əsəb dispanserində müalicə olunur.