ETSN sosial şəbəkədə yayılmış videogörüntüyə münasibət bildirib
ETSN sosial şəbəkədə yayılmış videogörüntüyə münasibət bildirib
İmişli rayonunun Qaraqaşlı kəndi ərazisində guya meşələrin qanunsuz kəsilməsi ilə bağlı sosial şəbəkədə yayılmış video görüntü təhrif olunub. Qeyd edək ki, həmin ərazi meşə fondu torpağı deyil, bələdiyyə ərazisidir, video görüntüdəki səxsin isə meşə sisteminə heç bir aidiyyəti yoxdur o, fermerdir.
Belə ki, Qaraqaşlı kənd sakinləri Kövsər Əhmədov və Seyid Seyidov tərəfindən İmişlidə meşələrin qanunsuz kəsilməsi ilə bağlı şikayət hələ 9 aprel 2017-ci il tarixində Nazirliyə daxil olub və dərhal yerində araşdırılıb.
Bu barədə Oxu.Az-a Ekologiya və Təbii Sərvətlər Nazirliyindən (ETSN) məlumat verilib.
Araşdırma zamanı müəyyən edilib ki, sözügedən ərazi meşə fondu deyil, İmişli rayon Qaraqaşlı bələdiyyəsinin mülkiyyətinə aiddir. Kənd təsərrüfatı təyinatlı 75 hektarlıq bu torpaq sahəsi Qaraqaşlı bələdiyyəsinin 21 fevral 2005-ci il tarixli icarə müqaviləsi ilə əkinçilik məqsədləri üçün Qaraqaşlı kənd sakini Əfrayil Əsədova 30 il müddətinə icarəyə verilib və icarə müqaviləsi Əmlak Məsələləri Dövlət Komitəsinin çıxarış sənədi ilə rəsmiləşdirilib. Əfrayil Əsədovun isə meşə sisteminə heç bir aidiyyəti yoxdur və o, fermerdir.
Qeyd edək ki, sözügedən ərazidə əvvəllər pambıq əkilib və uzun müddət istifadə edilmədiyinə görə sahəni yabanı yulğun kolları basıb. Torpaq istifadəçisi kənd təsərrüfatı bitkiləri əkmək məqsədi ilə ərazini yulğun kollarından təmizləyib. Lakin, kolların təmizlənməsinə dair icazə sənədi alınmadığına və yabanı yulğun kollarının qanunsuz təmizləndiyinə görə onun barəsində akt və protokol tərtib edilərək ümumilikdə 4220 manat məbləğində cərimə və ziyan tətbiq olunub. Toplanmış sənədlər ədalətli və hüquqi qiymət verilməsi üçün hüquq-mühafizə orqanlarına göndərilib.
Bildirilir ki, bir neçə ay öncə nazirlik tərəfindən araşdırılaraq tədbir görülmüş köhnə məlumatın sosial şəbəkədə yeni məlumat kimi gündəmə gətirilməsi və reallığın təhrif olunmuş şəkildə ictimaiyyətə çatdırılması yalnız şantajla məşğul olan reket saytların maraqlarına xidmət edir. Reallıqdan xəbərsiz olan sosial şəbəkə izləyiciləri isə bilmədən bu reketçilərin “toruna” düşür, ədalətsiz və haqsız fikirlərə, təhqirlərə yol verərək şantajçıların dəyirmanına su tökmüş olurlar.
Ekologiya və Təbii Sərvətlər Nazirliyi bir daha vətəndaşlara müraciət edərək bildirir ki, hər hansı ekoloji qanun pozuntusu ilə bağlı faktlarla rastlaşdıqları zaman nazirliyin 168 nömrəli “Qaynar xətt”inə və ya rəsmi facebook səhifəsinə məlumat versinlər. ETSN zəmanət verir ki, daxil olan şikayət dərhal vətəndaşın öz iştirakı ilə yerində araşdırılacaq.
S.B.
www.oxu.az