Mehdiabadı sahibsiz itlər basıb

Azərbaycanda daha bir azyaşlını küçə itləri dişləyib. 

Oxu.Az xəbər verir ki, bu barədə Lent.az-a hadisənin şahidləri xəbər verib. 

Bildirilir ki, dünən Abşeron rayonu, Mehdiabad qəsəbəsində 5-6 yaşında qızı küçədə it dişləyib. 

Qəsəbə sakini Həsən Əliyevin sözlərinə görə, qəsəbədə bir çox məhəllədə sahibsiz itlərin əlindən sakinlər gedib-gələ bilmirlər: “Dünənki hadisədən sonra məktəblilər məktəbə getməyə qorxurlar. Axşam işdən təzəcə gəlmişdim ki, küçədən itlərin səsini eşitdim. Həyətə qaçdım ki, itlər cavan gəlini divara qısıblar. İtləri qovdum. Mən daim küçədə keşik çəkə bilmərəm axı?! İtə daş atırsan, qaçmaq əvəzinə adamın üstünə cumur. Aidiyyəti qurumlar bu işlə məşğul olmalıdır”.

H. Əliyev məsələ ilə bağlı bələdiyyəyə, icra hakimiyyətinə müraciət etsə də, müraciətinə baxılmayıb.

Məsələ ilə bağlı Abşeron rayon Mehdiabad bələdiyyəsinin sədrinin müavini Elşən Şıxəliyev bildirdi ki, məsələdən xəbərdardırlar: “Bələdiyyə sədri ilə bu məsələni bu gün müzakirə etdik. Sabah qəsəbədəki sahibsiz itlər toplanacaq”.

E.Ə.
www.oxu.az