Könül Kərimovaya vurulan ziyandan 11 min manat ödənilib

Müğənni Könül Kərimovaya qarşı dələduzluq etməkdə təqsirləndirilən Məlahət Məmmədova ziyanın bir hissəsini ödəyib. 

Oxu.Az xəbər verir ki, K.Kərimovaya vurulan 32 min manat ziyandan 11 min manatı ödənilib.

Lakin K.Kərimova pulun hamısının ödənilməsini tələb edib və bununla bağlı Bakı Ağır Cinayətlər Məhkəməsinə müraciət edib. 

Qeyd edək ki, M.Məmmədovanın cinayət işi hazırda Bakı Ağır Cinayətlər Məhkəməsində araşdırılır. Prokuror onun cəzasını ümumi rejimli cəzaçəkmə müəssisəsində çəkməklə, 6 il 9 ay 29 gün müddətinə azadlıqdan məhrum edilməsini istəyib. 

Xatırladaq ki, M.Məmmədova vətəndaşların etibarından sui-istifadə edərək dələduzluq əməli törədib. O, ümumilikdə 300 minə yaxın pulu dələduzluq yolu ilə ələ keçirib.

Zərərçəkənlər arasında  Azərbaycanın əməkdar artisti, müğənni Könül Kərimova da var.

M.Məmmədova müğənninin oğlu Rəşad Rəhimovu Rusiya Universitetlərindən birinə qəbul etdirib, daha sonra Azərbaycan Dövlət İqtisad Universitetinə köçürtdürəcəyi ilə bağlı vəd verib. O, bu işə görə K.Kərimovadan ümumilikdə 32 min manat pul alıb.

M.Məmmədova Cinayət Məcəlləsinin 178.3.2-ci (dələduzluq, külli miqdarda) maddəsi ilə ittiham edilir.

Etibar Məmmədov
www.oxu.az