Bizimkilər Avropada - Araz debüt etdi
Bizimkilər Avropada - Araz debüt etdi
Bu həftəsonu Azərbaycanda olduğu kimi, Avropanın yaşıl meydanlarında da daxili çempionat oyunları keçirilib.
Oxu.Az Qafqazinfo-ya istinadən xəbər verir ki, xarici ölkələrin klublarında top qovan futbolçularımızdan bəziləri meydana çıxsa da, bəziləri heç “18-liy”ə düşməyib.
Araz Abdullayev – Kiprin “Anortosis” klubunda çıxış edən yarımmüdafiəçimiz "Nea Salamis”lə oyunda start heyətdə meydana çıxıb. Yeni klubunda rəsmi oyunlarda debüt edən futbolçumuz 83-cü dəqiqədə əvəzlənib. Matç isə 1:1 hesabı ilə başa çatıb.
Pavel Paşayev – Yığmamızın müdafiəçisi “Karpatı” ilə oyunda “Aeksandriya”nın heyətində 90 dəqiqə forma şansı qazanıb. Matç 0:0 hesabı ilə bitib.
Tural Hümbətov – Müdafiəçimizin şərəfini qoruduğu Makedoniyanın “Pobeda” klubu “Vardar”la qarşılaşıb. Həmyerlimiz bu matçın iştirak ərizəsinə salınmayıb. Komandası isə 0:4 hesablı məğlubiyyətlə üzləşib.
Emin Mahmudov – Onun formasını geyindiyi “Boavişta” “Maritimu”nun qonağı olub. Emin bu matçın iştirak ərizəsində yer almayıb. Komandası isə 0:1 hesabı ilə uduzub.
Ramil Şeydayev – Cəza səbəbindən “Jilina”nın B komandasına göndərilən Ramil orada fərqlənməyi bacarıb. O, “Novo Mesto”ya 2:0 hesabla qalib gəldikləri matçda hesabı açıb.
Samir Məsimov – Yarımmüdafiəçimizin çıxış etdiyi “Fakel” “Voronej”lə qarşılaşıb. Samir bu matçın iştirak ərizəsində olmayıb. Komandası isə 1:0 hesablı qələbə qazanıb.
Kamran Ağayev – Millimizin əsas qapıçısının çıxış etdiyi “Mlada Boleslav” “Slovan”la qarşılaşıb. “Slovan” bu görüşdə 3:0 hesablı qələbə qazanıb. Kamran matçın iştirak ərizəsinə salınmayıb.
İ.F.