Millimizin futbolçusu Türkiyə klublarına təklif olundu

Azərbaycanın 21 yaşadək futbolçulardan ibarət millisinin və “Neftçi” klubunun üzvü Elnur Cəfərov menecerlər vasitəsilə Türkiyənin “Bursaspor” klubuna təklif olunub.

Oxu.Az Türkiyənin “Olay” qəzetinə istinadən xəbər verir ki, 21 yaşlı futbolçu ilə Super Liqada çıxış edən başqa bir klubun – “Kayserispor”un da maraqlandığı bildirilir.

Qeyd edək ki, “Xəzər Lənkəran”ın yetirməsi olan Elnur Cəfərov ötən ilin iyulunda “Neftçi” ilə bir illik müqavilə bağlayıb. Hazırda U-21 yığmasının heyətində Türkiyənin Antalya bölgəsində toplanışda olan cinah yarımmüdafiəçisi ötən ilin noyabrında sosial şəbəkədə azarkeşi təhqir etdiyi üçün “Neftçi”nin əsas komandasından kənarlaşdırılıb. Lakin daha sonra o, baş məşqçi Tərlan Əhmədov tərəfindən bağışlanılıb.

S.T.
www.oxu.az