Rəşad Sadıqov: “Bizi çox gərgin sonluq gözləyir”

“Zirə”nin baş məşqçisi Rəşad Sadıqov Azərbaycan Kubokunun yarımfinal mərhələsinin cavab görüşündə “Qəbələ”yə qarşı keçirdikləri səfər oyununu şərh edib.

“Qafqazinfo” xəbər verir ki, o, 2:0 hesabı ilə qalib gəldikləri matçdan sonra keçirilən mətbuat konfransında bunları söyləyib:

“Futbolçularımı təbrik edirəm. İlk matçın son dəqiqələrində buraxdığımız qol rəqibə əlavə motivasiya verirdi. Rəqibin geridə qalan üç həftə ərzində verdiyi açıqlamalar da, bizdə əlavə narahatlıq yaradırdı. Maksimum konsentrasiya olmağa çalışdıq. Çünki bu tip oyunlarda ən vacibi oyuna köklənməkdir. İlk dəqiqələrdən futbolçularımda böyük diqqət və intizamı hiss edirdim. Yaxşı da başladıq. Bilirik ki, Kaxaber Sxadadze arxadan oyun qurmağı, topa nəzarət etməyi sevir, kombinasiyalı futbola üstünlük verir. Biz də çalışırdıq ki, pressinq tətbiq edək və onlara hücum qurmaqda problem yaradaq. Müəyyən səviyyədə alınırdı, hardasa da rəqib pressinqdən çıxırdı. İkinci yarıda hücum xəttinə daha gümrah oyunçuları əlavə edib, nəticəni öz xeyrimizə çevirmək istəyirdik. Şükür Allaha, alındı. Vladislav Kulaç gözəl zərbə vurdu, Rafael Utziq də baxımlı qola imza atdı. Bu da bizi sevindirir. Çox güc sərf etdik. Dörd gündən sonra bizi mövsümün bəlkə də ən vacib oyunu gözləyir. Məcburuq ki, kubok matçını tez unudaraq çempionat görüşünə köklənək.

Hər bir komanda mövsümü titulla başa vurmaq istəyir. Xüsusilə də, bu mövsüm. Biz də istəyirik ki, mövsümü titulla başa vuraq. Çünki finala qədər ağır yoldan keçdik. Yeganə komandayıq ki, 1/8, 1/4 və yarımfinalda yüksək liqa klubu üzərində qələbə qazanmalı olduq. İstəyirik ki, finalda da qazanan tərəf biz olaq. Rəhbərliyin qarşımıza qoyduğu bir hədəf var, avrokuboklara düşmək. İstər kubok, istərsə də çempionat yolu ilə. Amma çempionat elə keçir ki, “Neftçi” üzərində qələbə qazanırsan, digər tərəfdən rəqiblər də üç xal əldə edir. Hansısa üstünlük yarada bilmirsən. Görünən odur ki, bizi çox gərgin sonluq gözləyir. Qarşıdakı oyunları fikirləşirik. Bir aya çempionatda beş oyun var. Onları düşünürük. Hansısa yanlış davranış bizə ciddi problem yarada bilər. Son turda evdə “Səbail”lə oynayırıq. Avrokuboklara iddialı rəqibdir. Son tur həmişə fərqli olur. Bu oyunları düşündükdə, hansısa işin yaxşı getməsinə və finala çıxmağımıza görə sevinmək ağılsızlıq olar. Gözümün qabağında hazırda beş oyun canlanır”.