“Donuz qripi” Rusiyaya çatdı: ilk qurban var

“Donuz qripi” ilk dəfə dünya əhalisini 2009-cu ildə qorxudub. O zaman Meksikada və daha sonra Şimali Amerikada pandemiya – bütün ölkəni bürüyən epidemiya elan olunub. Xəstəlik Rusiya vətəndaşlarından da yan keçməyib. O zamanlar, rəsmi məlumatlara görə, 19 nəfər virusdan dünyasını dəyişib. Sonradan “donuz qripi” geriyə çəkilib, lakin qeybə çəkilməyib.

Oxu.Az Rusiya mətbuatına istinadən xəbər verir ki, Peterburqda bu mövsüm А/H1N1 virusundan ilk ölüm halı qeydə alınıb.  

“Bəli, bizim belə bir məlumatımız var. Xəstə Botkin yoluxucu xəstəliklər xəstəxanasında dünyasını dəyişib”, - deyə Sankt-Peterburq şəhərinin Səhiyyə Nazirliyinin mətbuat xidməti məlumat verib.

Bəzi məlumatlara görə, kişinin vəfat etməsinin səbəbi şəkər xəstəliyi nəticəsində yaranan ağırlaşma olub. Belə hallarda qrip daha ağır keçir.

Buna baxmayaraq, Peterburqda epidemiya elan etməyə ehtiyac duyulmur. 2019-cu ilin yanvar ayına olan məlumata görə, müayinə olunan 60 xəstədən 24-də А/H1N1 virusunun olduğu təsdiq olunub, beş nəfərdə isə А/H1N3 virusu aşkar edilib.