Suriya Təl-Əvivi hədələdi

Suriya Təl-Əviv aeroportuna zərbə endirə bilər.

Oxu.Az xəbər verir ki, bu barədə Suriyanın BMT-dəki daimi nümayəndəsi Bəşər Əl-Cəfəri açıqlama verib.

Diplomat bildirib ki, İsrail müdafiə qüvvələrinin Dəməşq beynəlxalq aeroportuna zərbələr endirməsindən sonra ölkənin müdafiə olunmağa və cavab olaraq Təl-Əviv aeroportuna atəş açmaya tam ixtiyarı var.

Cəfəri vurğulayıb ki, Təl-Əviv aeroportunun vurulmaması üçün BMT Təhlükəsizlik Şurası İsrailə qarşı qətnamə qəbul etməlidir.

Xatırladaq ki, yanvarın 21-də İsrail hərbi hava qüvvələri Suriya ərazisinə üç raket zərbəsi endirib.

Aviareydin hədəfi Dəməşqdə beynəlxalq aeroportun ərazisində olan silah-sursat anbarı və İrana aid digər hərbi obyektlər, həmçinin, Suriya ordusunun HHM kompleksləri  olub.

Nəticədə, Suriya ordusunun dörd hərbçisi həlak olub, altı nəfər yaralanıb. Aeroportun infrastrukturuna ziyan dəyib.