Kürdəmirdəki ailə münaqişəsinin detalları: “Qızımın bıçaqlanmağını qonşudan eşitdim” - YENİLƏNİB + VİDEO

Kürdəmir rayonunun Sığırlı kəndində baş verən ailə münaqişəsinin bəzi detalları məlum olub.

Baku TV xəbər verir ki, Rəcəb Bəkirov həyat yoldaşı Durbəs Bəkirovaya 20-dən çox bıçaq zərbəsi vurub.

Zərərçəkmişin atası Nuralı Babayev bildirib ki, qızını 3 ildir görmür:

“Bilmirəm qızıma bıçağı qayınatası, qayınanası, qaynı ya əri vurub. Mən onların hamısından şübhələnirəm. Mən qızımın üçüncü uşağını görməmişəm”.

D.Bəkirovanın anası Adirə Babayeva bildirib ki, illərdir qızını onlarla telefonla da danışmağa qoymurlar:

“Atası bir dəfə getmişdi, qayınanası deyib ki, bir də bura gəlmə. Qız da deyib ki, ata gəlmə, buna görə bunlar məni öldürərlər. Mən qızımın bıçaqlanmağını qonşudan eşitmişəm”.

R.Bəkirovun anası Şəfiqə Bəkirova bildirib ki, gəlini ilə çox mehriban münasibətləri olub:

“Onların evində heç bir söz söhbət olmayıb. Qışqırıq səsinə getmişəm. Gördüm gəlin qan içində yerdə uzanıb, mən də tez onu həkimə çatdırmışam. Mən gəlinimlə ana-bala münasibətində olmuşam. Biz də bilmirik nə baş verib”.

Ətraflı Baku TV-nin süjetini təqdim edirik:

11:28

Oktyabrın 3-ü saat 11 radələrində Kürdəmir rayonu Sığırlı kəndi ərazisində 1989-cu il təvəllüdlü Durbəs Bəkirovanın xəsarət alması barədə rayon prokurorluğuna məlumat daxil olub.

Kürdəmir Rayon Prokurorluğunda aparılan araşdırmalarla zərərçəkmişin əri, 1989-cu il təvəllüdlü Rəcəb Bəkirovun şəxsi münasibətlər zəminində aralarında yaranmış mübahisə zamanı Durbəs Bəkirovaya bıçaqla çoxsaylı xəsarətlər yetirərək onu qəsdən öldürməyə cəhd etməsinə əsaslı şübhələr müəyyən edilib.

Faktla bağlı Kürdəmir Rayon Prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb.

Rəcəb Bəkirov şübhəli şəxs qismində tutularaq istintaqa cəlb edilib.

İş üzrə istintaq davam edir.

Qeyd edək ki, dünən yayılan məlumatlarda R.Bəkirovun həyat yoldaşına 20 bıçaq zərbəsi vuraraq, hadisə yerindən qaçdığı bildirilmişdi.