Aybəniz Əkbər: Tahiri Fəxri Xiyabanda yox, qamışlıqda basdırdılar

Bir neçə gün öncə həyatını itirə tanınmış bəstəkar Tahir Əkbərin məzarının dəyişidirilməsi rezonans yaradıb.

Məsələ ilə bağlı Oxu.Az-a danışan bəstəkarın həyat yoldaşı Aybəniz Əkbər saytımıza açıqlamasında bunun Tahir Əkbərin vəsiyyəti olduğunu deyib:

“Bəstəkarlar İttifaqı və Mədəniyyət və Turizm Nazirliyinə müraciət etmişdim. Onlar kömək etsələr də, Tahir Əkbər kimi sənətkara haqsızlıq etdilər. Ona görə də onun məzarını dəyişdirdim. Həyat yoldaşı kimi bu, mənim borcumdur. Tahir sağlığında vəsiyyət etmişdi ki, məni Fəxri Xiyabanda dəfn etməsələr, atamın məzarında basdırarsan. Dedilər Qurd qapısında basdıracağıq, ancaq ora qamışlıq idi”.

Mədəniyyət Nazirliyinin informasiya və ictimaiyyətlə əlaqələr şöbəsinin müdiri Vüqar Şıxəliyev isə suallarımıza belə cavab verib:

“Təzə Pir məscidində keçirilən vida mərasimində nazir Əbülfəs Qarayev şəxsən iştirak edib, mərhumun yaxınlarına başsağlığı verib. Dəfn üçün yerin ayrılması ilə bağlı Mədəniyyət və Turizm Nazirliyinin müraciəti əsasında Bakı Şəhəri İcra Hakimiyyəti tərəfindən müvafiq yer ayrılıb. Mərhum bəstəkarın məzarının yerinin dəyişdirilməsi yəqin ki, ailəsinin qərarı ilə olub. Tahir Əkbərin əziz xatirəsini ehtiramla yad edir və ona Allahdan rəhmət diləyirik”.

Pərviz Hüseyn
www.oxu.az