Əfsanəvi müsabiqə geri dönür: “Bakı Payızı 2023 - 35 il sonra” - VİDEO

“Golden Arts entertainment”, “Best cast” heyətinin təşəbbüsü və Mədəniyyət TV-nin tərəfdaşlığı ilə əfsanəvi “Bakı Payızı” müsabiqəsi yenidən istedadları kəşf etməyə başlayacaq.

“Bakı Payızı 2023 - 35 il sonra” adı ilə keçiriləcək müsabiqə ulu öndər Heydər Əliyevin 100 illiyinə həsr olunur. Layihənin əsas məqsədlərindən biri də dünya azərbaycanlılarını sosial platformada birləşdirmək və Azərbaycan mədəniyyətini bütün dünyaya tanıtmaqdır.

Məşhur pianoçu, bəstəkar və musiqi prodüseri, Əməkdar artist Emil Əfrasiyabın sözlərinə görə, layihə təkcə vokal istedadlar üçün deyil, həm də dörd janr – qruplar, orijinal janr, xoreoqrafiya və bəstə üzrə böyük müsabiqəyə çevriləcək.

O, xaricdə yaşayan azərbaycanlılara müraciət edərək onları layihəyə qoşulmağa dəvət edib.

“Bu “Bakı Payızı” musiqi müsabiqəsi mədəniyyətimizin inkişafında, yeni istedadların üzə çıxarılmasında çox mühüm rol oynayır!” – deyə E.Əfrasiyab vurğulayıb.

Konsert günü iştirakçılar ilk dəfə Eldar Mansurovun, Vaqif Gərayzadənin, Faiq Sücəddinovun və Mikayıl Vəkilovun bəstələrini ifa ediblər. Müsabiqədə ən yaddaqalan məqam isə bəstəkarlar Mikayıl Vəkilov və Firuz İsmayılovun şair Malik Fərruxun sözlərinə bəstələdikləri “Azərbaycanım” mahnısının konsertin ulduzları tərəfindən birgə ifası olub.