Dünyaca məşhur filmlər çəkən “Marvel”in rəhbəri bir zənglə istefaya göndərildi

“Walt Disney” şirkəti xərclərin azaldılması kampaniyası çərçivəsində “Marvel Entertainmentin sədri İsaak Perlmutteri istefaya göndərib.

Onun “Disney”də yeddi min iş yerinin ixtisarı çərçivəsində işdən çıxarıldığı bildirilir.

80 yaşlı sədrin vəzifədən uzaqlaşdırılması ilə bağlı məlumat ona zəng edilərək verilib. 

Bildirilir ki, Perlmutterin işdən çıxarılması “Disney” şirkətinin baş direktoru Bob Ayqerlə mübahisədən sonra baş verib. Münaqişənin səbəbi 2022-ci ildə “Marvel” sədrinin “Disney”in direktorlar şurasında yer almağa çalışan investor Nelson Peltsi dəstəkləməsi, Aygerin isə buna qarşı çıxması olub.

Qeyd edək ki, Perlmutter 1990-cı illərdə “Marvel Entertainment”ə rəhbərlik edib. O, şirkətin 2009-cu ildə “Disney”ə 4 milyard dollarlıq satışının baş memarı olub. “Forbes”un məlumatına görə, Perlemutterin sərvəti 4 milyard dollar qiymətləndirilir. O, nəşrin milyarderləri siyahısında 683-cü yerdədir.

Mənbə: The New York Times