Azərbaycanın pulu borcundan üç dəfə çoxdur

2017-ci ildə ölkəyə daxil olan pul baratları 1.2 mlrd. ABŞ dolları təşkil edib. 

Oxu.Az xəbər verir ki, bu barədə Azərbaycan Mərkəzi Bankının 2017-ci il üzrə pul siyasəti icmalında qeyd olunub.

Bildirilir ki, ilkin rəqəmlərə əsasən, 2017-ci ildə ölkəyə daxil olan pul baratları 1,2 mlrd. dollar təşkil edib. Hansı ki, bu rəqəm 2016-cı ildə 564 milyon dollar olub - 2,13 dəfə az. 

2017-ci ildə ölkədə xarici müəssisə və təşkilatlar tərəfindən əsas kapitala investisiya axınları 8,6 mlrd. manat ekvivalentində olub. Əsas kapitala yönəldilmiş ümumi investisiyaların 55,4%-ni təşkil edib.

Xarici ölkələr və beynəlxalq təşkilatlar tərəfindən əsas kapitala yönəldilmiş vəsaitin çox hissəsi Böyük Britaniya, Türkiyə, Rusiya, İran, ABŞ, Yaponiya, Malaziya, İsveçrə və Çexiya sərmayədarlarına məxsus olub.

Xarici sektordakı müsbət proseslər özünü xarici valyuta ehtiyatlarının dinamikasında da büruzə verib. Ölkənin tədiyyə balansının yaxşılaşması şəraitində 2017-ci ildə strateji valyuta ehtiyatları 11%-dən çox artıb.

2017-ci ilin sonuna ölkənin strateji valyuta ehtiyatları 30 aylıq mal və xidmət idxalına kifayət edib və xarici dövlət borcunu 2,9 dəfə üstələyib.

L.Ə.
www.oxu.az