28 
Yan
2021
15:30
219
27
2077
Virtual karabakh

Sahibkarlar işğaldan azad edilən ərazilərdə ictimai iaşə müəssisələrinin yaradılmasına maraq göstərir - FOTO

28 Yan, 2021
15:30
2077

Sahibkarlar işğaldan azad edilən ərazilərdə ictimai iaşə müəssisələrinin yaradılmasına maraq göstərir - FOTO

Bizim WhatsApp kanalımıza buradan abunə ola bilərsiniz

Qida və ictimai iaşə sektorunun sahibkarları ilə pandemiya və post-pandemiya dövrü ilə bağlı müzakirələr aparılıb. Sahibkarlar işğaldan azad edilmiş ərazilərdə qida və ictimai iaşə müəssisələrinin yaradılmasına və bu sektora investisiya qoyuluşuna böyük maraq göstərir.

Bu barədə yanvarın 28-də Kiçik və Orta Biznesin İnkişafı Agentliyinin (KOBİA) dəstəyi, agentlik yanında İctimai Şuranın təşkilatçılığı və Azərbaycan Qida və İçki Sənayeçiləri Assosiasiyasının tərəfdaşlığı ilə keçirilmiş “Qida sənayesi və ictimai iaşə sektoru: mövcud vəziyyət və perspektivlər” mövzusunda onlayn forumda KOBİA-nın İdarə Heyətinin sədri Orxan Məmmədov bildirib.

Orxan Məmmədov qeyd edib ki, 2020-ci ildə müzəffər Ali Baş Komandanımız İlham Əliyevin qətiyyəti və rəşadətli ordumuzun qəhrəmanlığı nəticəsində torpaqlarımızın işğaldan azad edilməsi biznes üçün də yeni imkanlar açıb.

“İşğaldan azad edilmiş ərazilərdə biznes qurmaq istəyən sahibkarlardan indiyədək KOBİA-ya çoxsaylı müraciətlər daxil olub. Bu müraciətlər əsasən istehsal, turizm, tekstil, tikinti, tibb fəaliyyət, eləcə də qida sənayesi üzrə ictimai iaşə və kənd təsərrüfatı sahələrini əhatə edir. KOBİA tərəfindən işğaldan azad edilmiş ərazilərdə biznes qurmaq və investisiya yatırmaq istəyən sahibkarlara lazımi informasiya, əlaqələndirmə və məsləhət xidmətləri göstərilir” - deyə Orxan Məmmədov vurğulayıb.

KOBİA sədri həmçinin pandemiyanın ictimai iaşə sektoruna da təsirsiz ötüşmədiyini, hökumət tərəfindən müxtəlif dəstək mexanizmləri vasitəsilə biznesin qorunması istiqamətində aktiv tədbirlərin hazırda da davam etdirildiyini vurğulayıb. Post-müharibə dövründə və post-pandemiya ərəfəsində sahibkarların və dövlət qurumlarının iştirakı ilə keçirilən bu forum aktual müzakirələr üçün və dövlət-biznes dialoqu üçün əhəmiyyətli platformadır.

Azərbaycan Qida Təhlükəsizliyi Agentliyinin (AQTA) sədr müavini Balarəhim Quliyev çıxışında pandemiya dövründə AQTA-nın həyata keçirdiyi tədbirlər barədə məlumat verib, “COVID-19”la mübarizə tədbirləri çərçivəsində əhali və sahibkarlar arasında geniş maarifləndirmə işlərinin aparıldığını, ictimai iaşə, turizm, qida məhsullarının ticarəti ilə məşğul olan və digər sahibkarlıq subyektlərində monitorinqlərin keçirildiyini bildirib. Beynəlxalq və yerli ekspertlərin iştirakı ilə AQTA-nın işğaldan azad edilmiş ərazilər üzrə fəaliyyətinə dair konsepsiya sənədinin hazırlanaraq aidiyyəti üzrə təqdim edildiyini qeyd edən Balarəhim Quliyev işğaldan azad olunan rayonların dirçəldilməsində sahibkarların üzərinə də məsuliyyətli vəzifənin düşdüyünü, bu vəzifələrin icrası zamanı qarşıya çıxan məsələlərin həlli üçün sahibkarları agentliklə də aktiv əməkdaşlığa dəvət edib.

Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının vitse-prezidenti Vüqar Zeynalov çıxışında təşkilatın 2020-ci ildə pandemiyanın sahibkarlığın inkişafına təsirini azaltmaq üçün sahibkarların yanında olduğunu, onlardan daxil olan çoxsaylı müraciətləri və təklifləri dövlət qurumlarına təqdim etdiklərini, biznes subyektləri və dövlət orqanlarının iştirakı ilə müzakirələrin aparıldığını qeyd edib. 

Azərbaycan Qida və İçki Sənayeçiləri Assosiasiyasının sədri Emin Dostiyari çıxışında pandemiya dövründə qida sənayesi və ictimai iaşə sektorunda fəaliyyət göstərən sahibkarlıq subyektlərinin qarşılaşdıqları çətinliklər barədə məlumat verib, bu sektorda yeni iş yerlərinin açılması və iqtisadiyyatın canlanması üçün səyyar satış imkanlarına, dövlət dəstəyi ilə onlayn satış və çatdırma platformasının yaradılmasına və s. barədə assosiasiya üzvlərinin təkliflərini diqqətə çatdırıb.

KOBİA yanında İctimai Şuranın sədri Fərhad Qaraşov isə qeyd edib ki, forum qida sənayesi və ictimai iaşə sektorunda fəaliyyət göstərən KOB subyektlərinin pandemiya dövründə qarşılaşdıqları çətinliklərin və post-pandemiya dövründə gözləntilərinin dövlət-biznes dialoqu çərçivəsində müzakirə edilməsi, təkliflərin öyrənilərək aidiyyəti qurumlara çatdırılması məqsədilə təşkil olunub. “Tədbir agentlik yanında İctimai Şura tərəfindən təşkil olunan sayca 9-cu forumdur və 2021-ci il ərzində də əsasən pandemiyadan ziyan çəkmiş sektorlar olmaqla, iqtisadiyyatın müxtəlif sahələri üzrə ictimai müzakirələrin və digər tədbirlərin təşkili davam etdiriləcəkdir” - deyə Fərhad Qaraşov bildirib.

Onlayn forumda həmçinin, qida biznesi sahəsində fəaliyyət göstərən sahibkarlıq subyektlərinin problemləri müzakirə olunub, tədbir iştirakçılarının sualları cavablandırılıb.

Qeyd edək ki, karantin rejimi ilə əlaqədar onlayn formatda təşkil olunmuş foruma İqtisadiyyat Nazirliyi və onun struktur bölmələri, Kənd Təsərrüfatı Nazirliyi, Qida Təhlükəsizliyi və Dövlət Turizm agentliklərinin nümayəndələri, qida və ictimai iaşə sektorunda çalışan sahibkarlıq subyektləri (qida və kənd təsərrüfatı məhsullarının istehsalçıları, qida idxalçıları və ixracatçıları, market, restoran, kafe, otel və digər iaşə obyektləri sahibləri) və biznes assosiasiyalar qatılıb.

Bizimlə əlaqə saxlayın

Digər İqtisadiyyat xəbərləri