“İnnovasiya Festivalı”nı 2000-dən artıq insan ziyarət edib

Azərbaycanda ilk dəfə olaraq təşkil edilən “İnnovasiya Festivalı”nı (“İnnoFest”) ümumilikdə 1800-dən çox yerli sakin, 300-dən çox xarici qonaq ziyarət edib.

Bu barədə “İnnoFest”in yekunlarına dair mətbuat konfransında Yüksək Texnologiyalar Parkının direktoru Tural Kərimli deyib.

Onun sözlərinə görə, “İnnoFest” çərçivəsində beynəlxalq “Lightest” Forumu, “İKT innovasiyalar və startap ekosistemi” seminarı, “EU4Digital proqramı”nın təqdimatı, “Monex Caspian Sammit”i, Gənclər İnternet İdarəçilik Forumu və III Robot Olimpiadası təşkil olunub.

Tədbirlərə ümumilikdə 1500-dən artıq iştirakçı qatılıb və onlardan 158-i xarici qonaqlar olub.

Mətbuat konfransında iştirak edən ABŞ səfirliyinin mədəniyyət və təhsil üzrə müşaviri Heydi Smit “İnnofest”i yüksək qiymətləndirib və onun keçirilməsində Nəqliyyat, Rabitə və Yüksək Texnoloqiyalar nazirliyinin xidmətlərini xüsusi qeyd edib.