Gözlərə zərər vermədən smartfondan “asılı qalmağın” optimal vaxtı açıqlandı

Qadcetdən istifadə edərkən görmə qabiliyyətinə mənfi təsir göstərməyəcək optimal vaxt gündə ən çoxu 6 saatdır.

Bu barədə Rusiyada tibb elmləri namizədi, həkim oftalmoloq Serqey Xomyakov bildirib.

Onun sözlərinə görə, hər 20 dəqiqədən bir gözlərə dinclik verilməlidir.

Mütəxəssis həmçinin bildirib ki, cihaz nə qədər yeni olsa, o qədər təhlükəsizdir.

“Bu gün demək olar ki, hər bir insan gününü əlinə smartfon götürməklə başlayır, bütün günü onunla təmasda olur. Bundan əlavə kompüterdə işləmək, planşetdən oxumaq və s. də olur. Ancaq qadcetlərin ekranı nə qədər müasirdirsə, görmə üçün o qədər təhlükəsizdir”, - deyə o, bildirib.

Xomyakov narahatlıq yarada bilən xüsusiyyətlərdən birinin çox böyük ekran olmasını göstərib. Onun fikrincə, ən yaxşısı diaqonalı 5-20 düyüm arasında olan qadcetlərlə işləməkdir.