18 
Apr
2020
11:47
53
94
4470
Virtual karabakh

Elin Süleymanov: “Azərbaycanlıların ABŞ-dan vətənə qayıtması imkanlarını nəzərdən keçiririk” - MÜSAHİBƏ

18 Apr, 2020
11:47
4470

Elin Süleymanov: “Azərbaycanlıların ABŞ-dan vətənə qayıtması imkanlarını nəzərdən keçiririk” - MÜSAHİBƏ

Bizim WhatsApp kanalımıza buradan abunə ola bilərsiniz

Koronavirus pandemiyası fonunda azərbaycanlıların xaricdən geri qayıtması Azərbaycan hökumətinin diqqət mərkəzindədir. Bu yaxınlarda Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev və Azərbaycan Diasporla İş üzrə Dövlət Komitəsinin sədri Fuad Muradovun keçirdiyi brifinqdə də bununla bağlı qeyd edilib. Ən çətin epidemioloji vəziyyətlərdən biri ABŞ-da yaranıb. Bu ölkədə, Fuad Muradovun dediyi kimi, Azərbaycan diaspor nümayəndələri arasında COVID-19-a yoluxma halları qeydə alınır.

Media.Az-ın bugünkü həmsöhbəti Azərbaycanın ABŞ-dakı Fövqəladə və Səlahiyyətli Səfiri Elin Süleymanovdur.

- ABŞ-dan nə qədər azərbaycanlı vətənə qayıtmaq istəyir? Hansısa gərginlik varmı?

- Gərginlik barədə danışmazdım, belə şey yoxdur. Ancaq təbii ki, Azərbaycana qayıtmaq istəyən vətəndaşlarımız var. Onlar ABŞ-a bir müddətlik gəliblər, ancaq pandemiya vəziyyəti planlarını dəyişdirdi.

Sərhədlər bağlıdır, hava əlaqələri yoxdur. Tədris ilini bitirən tələbələr var. Hələ Birləşmiş Ştatlarda çalışan insanlar kateqoriyası da var, ancaq ölkədə iqtisadi çətinliklər yarandı. Buna görə də Azərbaycana qayıtmaq və ya heç olmasa hansısa kömək almaq istəyirlər.

Martın 21-i və 23-də sərhədlərin müvəqqəti bağlanmasından əvvəl Nyu-Yorkdan AZAL aviaşirkətinin iki reysi həyata keçirildi. Biz vətəndaşlarımıza bildirdik ki, bu, vətənə qayıtmaq üçün sonuncu imkandır, bundan sonra aviaəlaqə bir müddət dayandırılacaq. Kimsə reaksiya verdi, amma hamı yox. Təyyarələr natamam yükləmə ilə yola düşdülər.

ABŞ-da koronavirusla bağlı vəziyyəti ciddi qəbul etmək gərəkdir. Vəziyyət çətindir. Birləşmiş Ştatlar nəhəng bir ölkədir, ölkədə ştatdan-ştata, şəhərdən-şəhərə hərəkət yoluxma hallarını artırır.

Biz vətəndaşlarımızı karantin tədbirlərinə riayət etməyə və təşvişə yol verməməyə çağırırıq. Əlbəttə ki, soydaşlarımızın Azərbaycana qayıtmasının imkanlarını nəzərdən keçiririk. Ancaq bu mərhələdə, obyektiv səbəblərə görə, hətta üçüncü ölkələr vasitəsilə də bu, mümkün deyil.

Səhiyyə sisteminin imkanlarını da nəzərə almaq lazımdır. Azərbaycan nə qədər insanı karantinə qəbul edə bilər? Bu barədə hər kəs düşünmür. Bütün bu məqamları nəzərə alaraq, hesab edirəm ki, vətəndaşlarımız olduqları yerdə qalmalı, yerli hakimiyyətin göstərişlərinə əməl etməli və mütləq səfirlikdə və konsulluqda konsulluq qeydiyyatından keçməlidirlər.

Həftənin yeddi günü - 24 saat qaynar xəttimiz çalışır. Veb saytımız, sosial şəbəkələrdə səhifələrimiz var. Biz hər kəsə müraciət edirik: qeydiyyatdan keçin! Bununla özünüzə kömək edəcək, həm də bizim işimizi asanlaşdıracaqsınız.

- Azərbaycana qayıtmaq istəyən vətəndaşlarımızın təxmini sayı varmı?

- İndiyə qədər onlarla insan müraciət edib.

- ABŞ-da karantin şərtləri necədir? İnsanlardan nə tələb olunur?

- Məsafə saxlamaq, maska taxmaq. Yoluxma riski yüksəkdir, üstəlik, xəstəlik əksər hallarda simptomsuz keçsə də, bu, virusun ötürülməsinə mane olmur. Buna görə bir daha deyim ki, karantin, xaricdən Azərbaycana gələn vətəndaşların müşahidəsi çox vacib məqamdır. İstənilən ölkədə məhdud sayda çarpayı var.

- Bu yaxınlarda Nyu-Yorkda çalışan azərbaycanlı həkim Tamara Əliyeva ilə danışdım. Təəssüf ki, koronavirusa yoluxub. Tamara Əliyeva ABŞ-ın səhiyyə sisteminin yüklənmənin öhdəsindən gələ bilmədiyini söylədi. Niyə?

- Xəstələrin eyni vaxtda axını istənilən səhiyyə sistemini tarazlıqdan çıxara bilər. Bu, həm İtaliyada, həm də İspaniyada baş verdi. Buna görə karantin tədbirləri çox vacibdir. Görünür, ABŞ-da tədbirlər kifayət etməyib. Amerika Birləşmiş Ştatları federal dövlətdir, hər bir ştatın öz qanunları və problemə yanaşması var. Bütün bunlar yaranmış problemə kifayət qədər operativ reaksiya verilməməsinə səbəb oldu. Ancaq indi vəziyyət yaxşılaşır.

Yeri gəlmişkən, Prezident İlham Əliyevin, Birinci vitse-prezident Mehriban Əliyevanın reaksiyaları, Azərbaycan hökumətinin fəaliyyətləri, əhaliyə müraciətlər göstərir ki, Azərbaycan insanların sağlamlığına vaxtında qayğı göstərərək, problemin həllinə çox bacarıqla yanaşır. Bir çox ölkələrdən fərqli olaraq, Azərbaycan tamamilə şəffaf işləyir. Operativ və açıq fəaliyyət göstərən operativ qərargah yaradılıb.

Sonda mən ürəkdən sizin mənə barəsində indi bəhs etdiyiniz, Nyu-Yorkda çalışan həkim Tamara Əliyevanın sağalmağını arzulayıram. Amerika Birləşmiş Ştatlarının Azərbaycan icmasının xəstələnmiş digər nümayəndələri haqqında da bilirik. Bir çoxu artıq sağalıb, klinikalardan evə buraxılıb. Biz narahat oluruq, tez-tez əlaqə saxlamağa çalışırıq. Və mən bizim bütün soydaşlarımızı dəstəkləyən diasporamıza minnətdaram.

Bizimlə əlaqə saxlayın

Digər Siyasət xəbərləri