Hakimlərin də maaşları artırılır - YENİLƏNİB

Azərbaycanda hakimlərin maaşı artırılır.

Oxu.Az xəbər verir ki, bununla bağlı “Məhkəmələr və hakimlər haqqında” qanun layihəsi Milli Məclisin iyunun 27-də keçirilən növbədənkənar sessiyasının iclasında birinci oxunuşda müzakirəyə çıxarılıb.

Belə ki, adıçəkilən qanunun 106-cı maddəsinə (hakimlərin maddi təminatı) dəyişiklikdə qeyd edilib ki, hakimlərin aşağıdakı məbləğdə aylıq vəzifə maaşları müəyyən edilir və onlara bir aylıq vəzifə maaşı həcmində vəzifə maaşına əlavə ödənilir:

- Ali Məhkəmə sədrinə Milli Məclis sədrinin aylıq vəzifə maaşı həcmində, yəni 2475 manat;
- Naxçıvan Muxtar Respublikası Ali Məhkəməsinin və apellyasiya məhkəmələrinin sədrlərinə ali məhkəmə sədrinin vəzifə maaşının 90 faizi həcmində;
- Ağır cinayətlər məhkəmələrinin, Naxçıvan Muxtar Respublikası ağır cinayətlər məhkəməsinin, hərbi məhkəmələrin və inzibati-iqtisadi məhkəmələrin sədrlərinə Ali Məhkəmə sədrinin vəzifə maaşının 80 faizi həcmində;
- Digər məhkəmələrin sədrlərinə Ali Məhkəmə sədrinin vəzifə maaşının 70 faizi həcmində;
- Bütün məhkəmələrin sədr müavinlərə müvafiq məhkəmə sədrinin vəzifə maaşlarının 90 faizi həcmində;
- Ali Məhkəmənin, Naxçıvan Muxtar Respublikası Ali Məhkəməsinin və apellyasiya məhkəmələrinin kollegiya sədrlərinə müvafiq məhkəmə sədrinin vəzifə maaşının 85 faizi həcmində;
- Bütün məhkəmələrin hakimlərinə müvafiq məhkəmə sədrinin vəzifə maaşlarının 80 faizi həcmində müəyyən edilir.

Qanun layihəsi müzakirələrdən sonra səsverməyə çıxarılaraq birinci oxunuşda qəbul edilib.

12:18

Prezident İlham Əliyev bir çox sahələrlə yanaşı, məhkəmə-hüquq sistemində də maaşların artırılmasına diqqət yetirir.

Bu barədə Oxu.Az-a Milli Məclisin deputatı, parlamentin İqtisadi siyasət, sənaye və sahibkarlıq komitəsinin üzvü Vahid Əhmədov bildirib.

O qeyd edib ki, bu da məhkəmə-hüquq sistemində korrupsiya hallarının qarşısını almaq baxımından kifayət qədər müsbət addımdır:

“Bu sistemdə çalışan şəxslər Prezident İlham Əliyevin bu humanist addımını nəzərə almalı, neqativ halların aradan qaldırılmasına çalışmalıdırlar. Məhkəmə sistemində təyin edilən maaşla həmin şəxslər çox rahat şəkildə dolanışıqlarını təmin edə bilərlər.

Hər kəs başa düşməlidir ki, ölkə başçısının bu addımı məhkəmə-hüquq sistemində korrupsiya hallarının tamamilə aradan qaldırılmasına və şəffaflığın artrılmasına yönəlib”.

Kamil Həmzəoğlu
Könül Cəfərli