Dünya ölkələri Azərbaycan Prezidentinin ideyası ətrafında birləşdi - VİDEO

Dünya müharibəsi ilə müqayisə olunan COVID-19 pandemiyası şəraitində qlobal həmrəyliyə və qlobal baxışa böyük ehtiyac var.

Təəssüflər olsun ki, böyük dövlətlər və beynəlxalq təşkilatlardan qlobal liderlik gözlənilsə də, bunu müşahidə etmək çətindir. Pandemiya ilə nümunəvi mübarizə aparan Azərbaycan isə belə bir vəziyyətdə yenə də bütün dünyanın diqqətini öz üzərində cəmləməyə nail olub.

Birləşmiş Millətlər Təşkilatının 130-dan çox üzv dövləti tərəfindən Prezident İlham Əliyevin BMT Baş Assambleyasının xüsusi sessiyasının keçirilməsi barədə təşəbbüsünün dəstəklənməsi beynəlxalq ictimaiyyətin Azərbaycana böyük etimadının və hörmətinin daha bir əyani göstəricisidir. 

Mövcud durum bir daha onu göstərir ki, dünya ölkələrinin dövlət və hökumət başçıları səviyyəsində BMT çərçivəsində həll yollarının tapılmasına böyük ehtiyac və tələbat var. Bu gün dünyada ən böyük və nüfuzlu beynəlxalq təşkilat BMT-dir, Azərbaycanın isə BMT-ni idarə etmək təcrübəsi var.

Ölkəmiz BMT Təhlükəsizlik Şurasının qeyri-daimi üzvü seçilib və Təhlükəsizlik Şurasına sədrlik edib. Belə bir təşəbbüsün irəli sürülməsi və dəstəklənməsinə nail olunması BMT-nin fəaliyyətinə dərindən bələd olan Azərbaycan və onun siyasi rəhbərliyinin məntiqi, düşünülmüş addımı kimi qiymətləndirilməlidir. 

O da təsadüfi deyil ki, bu təşəbbüsə qarşı çıxış edən yeganə dövlət yenə də destruktiv davranışı ilə özünü artıq dünyada biabır etmiş Ermənistan olub. Bütün dünya COVID-19-a qarşı mübarizədə qlobal həmrəyliyin vacibliyini vurğuladığı halda, ən ali dəyər olan insan sağlamlığı məsələsinin beynəlxalq platformada müzakirəsinə razılıq verdiyi halda, Ermənistan təşəbbüsə qarşı çıxır. Beləliklə də, təcavüzkar Ermənistan növbəti dəfə əsl dəyərlərinin nədən ibarət olduğunu nümayiş etdirərək, özünü ifşa edir.

Daha ətraflı Baku TV-nin süjetində: