21 
Okt
2020
12:42
1540
33
4552
Virtual karabakh

Polkovnik: “Ermənistanın qeyri-qanuni hərbi texnikasına rəğmən Azərbaycan ordusu qələbə qazanır”

Bu gün Azərbaycan ordusu 30 ildir Ermənistanın işğal altında saxladığı doğma torpaqlarını geri alır. Ard-arda qazanılan qələbələr isə Azərbaycan xalqının əzmini, ordumuzun isə döyüş ruhunu daha da artırır. Məhz bu məqamda bir məsələyə aydınlıq gətirmək yerinə düşər. Zaman-zaman səslənən “İllər boyu hərbiyə xərclənən milyardlar hanı?”, “Aldığımız hərbi texnikalar hanı?” ifadələr yəqin ki, sizin də rastınıza çıxıb. Bu gün rəşadətli Azərbaycan ordusunun qazandığı qələbələr düşünürəm ki, bütün bu suallara ən möhtəşəm cavabdır.

Mövzu ilə əlaqədar ehtiyatda olan polkovnik, hərbi ekspert Şair Ramaldanov Oxu.Az-a açıqlamasında daha əvvəl alınan ən müasir hərbi texnikaların bu gün Azərbaycan ordusunun gücünü daha da artırdığını deyib:

“Azərbaycan ordusunun canlı qüvvəsinin gücünə-güc qatan müasir hərbi texnikalar bu gün itkilərin də azalmasına gətirib çıxarır. Əgər zamanında Azərbaycan ordusuna müasir hərbi texnikalar, silah-sursat alınmasa idi ordumuz bu gün texniki üstünlüyü əlində saxlamazdı. Yayılan videogörüntülərdən də görürük ki, cəbhə xəttindən qat-qat uzaqda şəxsi heyət döyüşə girmədən belə düşməni necə zəiflədir.

Düşmənin texniki atəş vasitələri darmadağın edilib. Bu da öz növbəsində onların döyüş qabiliyyətini azaldır. Müqavimətin azalması düşmən ordusunun şəxsi heyəti arasında canlı qüvvəsinin itkilərə məruz qalması deməkdir. Əgər düşmənin canlı qüvvəsi arasında itkilər artırsa, bu bizim döyüş tapşırıqlarımızı daha da uğurla yerinə yetirməyimizə zəmin yaradır.

Azərbaycan Respublikasının Prezidenti, Ali Baş Komandan İlham Əliyev dəfələrlə öz çıxışında Azərbaycan ordusuna alınan ən müasir hərbi texnikalardan, ordumuzun gücündən danışıb. Cəmiyyətimiz də gördü ki, bu illər ərzində alınan silah-sursat məhz bu günlər üçün idi. 30 illik bir düşmənin üzərinə getmək çətin məsələdir, böyük məsuliyyət tələb edir. Bunun üçün ən müasir silah-sursata ehtiyac var. Amma onu da qeyd etmək lazımdır ki, bu illər ərzində Azərbaycanda güclü, peşəkar sərkərdə, komandir heyəti yetişib. Onlar düşmənə maksimum zərbə endirməklə, şəxsi heyəti qoruyaraq, itkilərin sayını minimuma endirəcək döyüş üsulu seçirlər. Bunun səbəbkarı isə Ali Baş Komandanımızın orduya göstərdiyi diqqət və qayğıdır”.

Polkovnik Ş.Ramaldanov Ermənistan tərəfinin məhv edilən hərbi texnikasına və silah-sursata rəğmən mövcud silahların necə alınması və bu işə nəzarət edən qurumların laqeydliyi barədə də danışıb.

Hərbi ekspert bildirib ki, ölkə başçısı da öz çıxışında düşmənin bu qədər silah-sursatı haradan əldə etdiyinə dair sualların cavabını gözlədiyini qeyd edib:

“Bütün hərbi statistik məlumatlara əsaslansaq, artıq Ermənistanın hərbi texnikası məhv olmalı idi. Lakin biz görürük ki, onlar hələ də müxtəlif hərbi texnikalardan, silah-sursatdan istifadə edirlər. Bu da onu göstərir ki, Dağlıq Qarabağ ərazisində doğurdan da nəzarətdə olmayan və beynəlxalq qurumların nəzarətindən kənarda qalan silah-sursat, texniki vasitələr çoxdur.

Nə üçün beynəlxalq təşkilatlar buna nəzarət etməyib, təftiş etməyib bu da ayrı bir sualdır. Azərbaycan bu məsələni mütləq qaldıracaq və müvafiq faktları təqdim edəcək. Bu günə qədər də Azərbaycan beynəlxalq qurumların qarşısında bu məsələni qaldırırdı, lakin eşidən olmurdu. Amma bu gün hər kəs görür ki, rəsmi statistikada göstəriləndən qat-qat artıq hərbi texnikaları onlar gizlədiblər. Amma bu belə Azərbaycan ordusunun qarşısını ala bilmir. Ermənistanın qeyri-qanuni hərbi texnikasına rəğmən Azərbaycan ordusu qələbə qazanır. Azərbaycan ordusu qarşıya qoyulan tapşırığı tam yerinə yetirərək, bu bölgəni də beynəlxalq qurumlara açıq edəcək. O artıq Azərbaycanın ərazi bütövlüyünün çərçivəsində, bütün Azərbaycan qayda-qanunlarına tabe olacaq”.

Könül Cəfərli 

Bizimlə əlaqə saxlayın

Digər Siyasət xəbərləri