“PAŞA Sığorta” Uşaqların Beynəlxalq Müdafiəsi günü münasibəti ilə “Güvənli Gələcək” adlı layihəyə star verir

Daim Korporativ Sosial Məsuliyyət layihələrinə böyük önəm verən “PAŞA Sığorta” şirkəti bu dəfə  “PAŞA Holdinq”in dəstəyi, “Stop uqroza” (Стоп Угроза) beynəlxalq uşaqlar və valideynlər üçün təhlükəsizlik məktəbinin rəsmi təmsilçisi “GİD CSR Consulting” şirkətinin təşkilatçılığı ilə Uşaqların Beynəlxalq Müdafiəsi Günü münasibəti ilə “Güvənli Gələcək” adlı sosial layihəyə start verir. 

Layihənin təşkil olunmasında əsas məqsəd paytaxtımız və bölgələrimizdə yerləşən uşaq evləri, sığınacaqlar və aztəminatlı ailələrin uşaqları üçün təhlükəsizlik üzrə təlimlərin keçirilməsidir.

Təlimlər bu gün dünyada və ölkəmizdə aktual mövzular olan “Beş saniyə ərzində oğrulardan necə xilas olmaq olar?” və “Bullinqə son!” mövzularına həsr olunacaq. Bu təlimlərdə 8-14 yaş aralığında olan 600 uşağın iştirakı nəzərdə tutulub. Hazırda dünyada 35% uşağın “Bullinqə” məruz qaldığı və təxmini olaraq 31% azyaşlının itkin düşdüyü məlumdur. Layihədə əsas məqsəd ölkəmizdə bu halların azaldılması və övladlarımızın müdafiəsidir. 

“Bullinqə son!” adlı təlimdə uşaqlar zərərli hərəkətlər və təsadüfi təhqirləri ayırmağı, cinayətkarları tanımağı, vəziyyətdən asılı olaraq mənəvi müqavimətin ən təsirli yollarını necə tapmağı, gizli manipulyasiyaları görməyi və onlara qarşı mübarizəni öyrənəcəklər. Bu təlimin gedişatında uşaqlarda hər hansısa qəribə hallara düzgün reaksiya vermək bacarığı aşılanaraq, vaxtında mübarizə aparmaq üçün böyüklərə müraciət edib susmamağın nə qədər vacib olduğu öyrədiləcək. Təlimlərin nəticəsi olaraq, bu kimi halların baş verməsində azalma müşahidə ediləcəyi düşünülür.

“Beş saniyə ərzində oğrulardan necə xilas olmaq olar?” adlı təlimdən sonra uşaqlar öz təhlükəsizliyi üçün məsuliyyəti daha yaxşı dərk edir, dostları ilə alınan məlumatları müzakirə edərək, yeni məlumatlar əsasında davranış alqoritmini formalaşdırır. Təlimin nəticəsi olaraq uşaqlarda “Cinayətkar” obrazı yox olur, aydın şəkildə başa düşülür ki, real həyatda oğurluq edən şəxs xarici görünüş olaraq, ümumiyyətlə şübhə yaratmaya bilər. Həmçinin, uşaqlar onları əhatə edən insanları dostlar və kənar adamlar qruplarına ayırmağı bacaracaq və onlarda etimad dairəsi haqqında anlayış yaranacaq. Təlimdən sonra bütün uşaqlar təhlükə zamanı hara qaçmalı olduqlarını və niyə dərhal böyüklərə hər şeyi danışmağın vacibliyini dərk edəcəklər.

Bir neçə ay davam edəcək layihə sözügedən mövzularda təlimlərin keçirilməsi, maarifləndirmə xarakterli çarxların hazırlanması və məktəblilər arasında təbliğat işlərinin aparılması kimi mərhələlərdən ibarətdir. Dərslər bu sahədə ixtisaslaşmış beynəlxalq təlimçilər tərəfindən və beynəlxalq proqramlar əsasında peşəkarcasına təşkil edilir. Nəticədə uşaqlar burada  məmnuniyyətlə iştirak edir, bütün həyati alqoritmləri yadda saxlayır və praktikada təhlükəsiz davranış bacarıqlarına yiyələnirlər. 

Əminik ki, bu tip xüsusi proqramların keçirilməsi, gələcəkdə həyatın bütün mərhələlərində vacib situasiyalar zamanı övladlarımızın həyatında öz müsbət əksini tapacaq.

“PAŞA Sığorta” şirkəti 2006-cı ildən fəaliyyət göstərir. “PAŞA Holdinq” qrupunun üzvü olan “PAŞA Sığorta” 300 000-ə yaxın korporativ və fərdi müştərisinə 36 növ könüllü və icbari sığorta üzrə xidmət göstərir. Şirkət kapitalının, sığorta yığımlarının, sığorta ödənişlərinin həcmi və digər göstəriciləri ilə sığorta bazarının lider və ən böyük sığorta şirkətlərindəndir.