Zığ yolunda istifadə olunan radar mükafata layiq görüldü - FOTO

Proqram təminatı, avadanlıq və dizayn üçlüyünü birlikdə inkişaf etdirərək, öz innovativ ideyaları ilə yeni nəsil “ağıllı şəhər”, “təhlükəsiz şəhər” texnologiyaları sahəsində dünya bazarında lider olan, dünyanın ilk və yeganə ağıllı səyyar patrullarının ixtiraçısı olan “Ekin Smart City Technology” şirkətinin “Ekin Spotter” avadanlığı ABŞ-da İstehlakçı Texnologiyaları Assosiasiyası tərəfindən “Ağıllı Şəhərlər” kateqoriyasında “CES 2021 Innovation Award” mükafatına layiq görülüb.

ABŞ-da İstehlakçı Texnologiyaları Assosiasiyası tərəfindən hər il keçirilən CES (“Consumer Electronic Show”) dünyanın ən nüfuzlu texnologiya tədbirlərindən biri hesab olunur. 

Tədbir çərçivəsində innovasiya mükafatı istehlakçı texnologiyası məhsullarında dünyanın ən qabaqcıl və üstün dizayn, keyfiyyət və mühəndislik meyarları nəzərə alınaraq təqdim olunur.

“Ekin Smart City Technology” şirkətinin süni intellektlə çalışan “ağıllı şəhər” texnologiyaları dövlət sektoruna, özəl müəssisələrə və hüquq-mühafizə orqanlarına yol hərəkətinin idarə edilməsi, ətraf mühit üzrə təhlillərin aparılması və müşahidələrin dəstəklənməsi üçün dinamik məlumat toplama imkanları verir. “Ekin Spotter” yol-nəqliyyat hadisələrinin qarşısını almaq və karbon emissiyalarını azaltmağa kömək etmək məqsədilə yol-hərəkət qaydalarının təhlili, park idarəçiliyi və qırmızı işığın mühafizəsi də daxil olmaqla bir çox funksiyanı bir məhsulda birləşdirən ilk və yeganə “ağıllı şəhər” cihazıdır.

“Ekin Spotter” avadanlığı, həmçinin hamar dizaynı, keyfiyyətinə uyğunlaşması ilə seçilir, müxtəlif iri avadanlıqlara ehtiyac olmadan, bir mexanizmdə istifadəçilərə avtomatik nömrə tanıma, yol-hərəkət qaydalarının pozulmasının aşkarlanması, müşahidə, ətraf mühitin təhlili, dinamik və Wi-Fi qaynar nöqtə modulları da daxil olmaqla, əsas “ağıllı şəhər” imkanlarını təqdim edir.

Qeyd edək ki, “ağıllı şəhər” və “təhlükəsiz şəhər” texnologiyaları sahəsində dünyanın aparıcı şirkətlərindən hesab olunan “Ekin Smart City Technology” şirkəti artıq 12 ildir ki, Azərbaycanda da uğurla fəaliyyət göstərir.