Bəstəkarlardan “Kazbekə şey basım, zırlanım” videosuna - SƏRT REAKSİYA

Son günlər sosial şəbəkələrdə geniş yayılan, ifaçı Vüqar Sədanın oxuduğu “Kazbek” musiqili meyxanaya çəkilən video ətrafında qalmaqal daha da alovlanıb. 

Gənclərin bu mahnı sədaları altında oxuyub rəqs etməsi cəmiyyətdə xoşagəlməz hal kimi qiymətləndirilib.

Narkomaniyanı təbliğ edən bu cür mahnıların gənclər arasında təbliği və onların tərbiyəsinə vurduğu zərbəyə sənət nümayəndələri də biganə qalmayıb.

Oxu.Az-ın əməkdaşı bir sıra Əməkdar və Xalq artistlərinin “Kazbek” mahnısına münasibətini öyrənib.

Oxu: “Kazbek” mahnısına görə nazirə və baş prokurora müraciət olundu – VİDEO

Əməkdar artist, bəstəkar Gövhər Həsənzadə Vüqar Sədanı və onun ifa etdiyi mahnını pisləyib:

“Mən deməkdən, siz də yazmaqdan yoruldunuz. Dərd bundadır ki, bu kimi mahnıları oxuyurlar, çıxarırlar göz önünə. 1-2 günə hər gün baxdığımız televiziyalarda və efirlərdə bu müğənnini və onun ifa etdiyi mahnını çıxaracaqlar müzakirəyə və beləcə, təbliğ olunacaq. Guya pisdir. Axı pisi də təbliğ etmək olmaz. Antireklam özü bir reklamdır. 

Biz nəyə qulluq edirik? Biz bu yolla nə etmək istəyirik? Pis həmişə var, həmişə olub, olacaq da. Mən 35 ildən çoxdur ki, incəsənətdəyəm. Bizim vaxtımızda guya pis yox idi? Bizim vaxtımızda senzura var idi. Bizə layiq olmayanları, eyib olanları efirlərdə nə göstərirdilər, nə də yayımlayırdılar. İndi biz bu pisləri niyə çıxarıb reklam edirik?”

Xalq artisti, bəstəkar Faiq Sücəddinov qalmaqallı mahnıdan hiddətləndiyini bildirib:

“Mən bu cür musiqilərə və mahnılara qulaq asmıram. Çünki əsəb keçirirəm. Heç dinləmək belə istəmirəm. Bunları görüb, eşidəndə o qədər əsəbiləşirəm ki... Mahnı başdan ayağa nalayiq ifadələrlə doludur”.

Oxu: Vəkil qalmaqallı video barədə - 10 ilə qədər həbs oluna bilər

Qeyri-etik ifadələrin yer aldığı və narkomaniyanı təbliğ edən mahnı ilə bağlı Xalq artisti, bəstəkar Eldar Mansurov da sərt mövqe nümayiş etdirib:

“Mən indiki müğənnilərin heç birini tanımıram. Tanıdıqlarım isə Azərbaycanın məşhurları Flora Kərimova, Yalçın Rzazadə, Mirzə Babayevdir. İndikilər nə oxuyur, mənə heç bir adiyyəti yoxdur. Şəxsən mən nə televizora baxıram, nə də internetdə yer alan bu kimi musiqilərə qulaq asıram”.

Rəşad Əliyev