Roza Zərgərli: “Belə getsə, musiqiçilər çörəksiz qalacaq”

“Ən çətin vəziyyətdə qalan musiqiçilər oldu. Biz müğənnilər bir başqa cür əziyyət çəkdik. Amma musiqiçilər tam başqa. Onlar günlük işləyən insanlardır. Nə qədər arxalarında pul olsa da, bir il dayana bilməzdilər. İstərdik ki, musiqiçilər haqqında aidiyyəti qurumlar düşünsün. Pandemiya nə qədər olacaq bilinmir. Başqa problem də yarana bilər. Bunlar çörəksiz qalacaq.

Axşam.az xəbər verir ki, bu sözləri müğənni Roza Zərgərli ARB telekanalında yayımlanan “Xəbər-ətər” proqramında deyib. Sənətçi pandemiya ərəfəsində sənət adamlarının işsiz və gəlirsiz qalmasından söz açıb. O bildirib ki, ən çox əziyyəti musiqiçilər çəkir:

“Çoxları ailəlidir, evinə çörək aparmalıdır. Müğənnilər isə oxumağı unudub”.

Roza Zərgərli telekanalların sənət adamlarına qarşı diqqətsiz olduğunu deyib:

“Gənclərə yer vermirlər. Özüm “Bakı vaxtı ilə” adlı proqram aparıram. Novruz bayramı üçün çəkiliş edirdim. Beş sözünü demiş ifaçı çağırdım, qalan isə gənclərə üstünlük verdim. Cavanlara yol verilməlidir, onlar çoxlarından istedadlıdırlar”.