“Bakı Atlantidası”nı bərpa etmək istəyirlər - Müəlliflər layihə haqqında - FOTO

2019-cu ilin əvvəlində batmış Səbail qalasının restavrasiyası ilə bağlı möhtəşəm layihə nümayiş etdiriləcək. 

Oxu.Az xəbər verir ki, bu hekayə 2015-ci ildən başlayır.

Birlikdə işləyən iki cavan oğlanda – Rəsul Həsənov və Ramiz Əlilidə sirli qalanın restavrasiyası ideyası yaranıb və onlar Azərbaycanın tarixi irs nümunələrində bu barədə mövcud olan bütün materialları dərindən öyrənməyə başlayıblar.

Bir il davam edən gərgin işlərdən sonra gənclər qalanın 3D görüntüsünü hazırlaya biliblər. Bütün kiçik detallar nəzərə alınıb. 

Layihənin dövlət strukturlarına təqdim edilməsi üçün yalnız tarixçilər, memarlar və iqtisadçıların bu işə cəlb edilməsi lazım idi. Ancaq həmin dövrdə bütün dünyada başlayan iqtisadi böhran səbəbindən gənclər döydükləri bütün qapılardan rədd cavabı alırdılar. 

“İdeya möhtəşəm idi. Təşəbbüsümüz sosial şəbəkədə alqışlanırdı. Baxmayaraq ki, layihəmizə sübhə ilə yanaşanlar da oldu, deyirdilər ki, vaxtı deyil...”, - Oxu.Az-ın müxbiri ilə söhbətində layihənin müəlliflərindən olan Ramiz Əlili deyib.

Uzun sürən cəhdlərdən sonra Ramiz və Rəsul bütün sənədləri kənara qoydular. Bundan sonra qəhrəmanlarımızın yolları ayrılır. Gənclər bu illər ərzində çoxlu uğurlara imza atırlar. Bu gün onların hər birinin şəxsi şirkəti var. 

İdeyaya ikinci nəfər

Bir neçə ay əvvəl tale Rəsul və Ramizi yenidən bir araya gətirdi və onlar Səbail qalasının restavrasiya layihəsinin dövlət tərəfindən təsdiqlənməsinə cəhd edilməsi qərarına gəldilər. 

“Bu gün Azərbaycan dünyanın ən sürətli inkişaf edən ölkələrindən biridir. Biz qısa müddətdə turizmi inkişaf etdirə bildik. Bu gün bizim layihəmizə daha çox ehtiyac var. Səbail qalası bizim tarixi sərvətimizdir və o, Azərbaycana turizm axının artmasına xidmət edə bilər. Biz layihəni daha həvəslə bərpa etdik və 2019-cu ilin əvvəllərində bunu hökumətə təqdim etməyə hazırlaşırıq”, - Rəsul Həsənov bildirib. 

Səbail qalası

Qala 1234-cü ildə Şirvanşah III Fəribürz tərəfindən inşa etdirilib və Bakının Bayıl burnu yaxınlığında, Karvansaray adasında yerləşir. Sonradan qala Səbail, Şəhri Səba, Şəhri nau, yeraltı şəhər, karvansaray, Bail daşları və s. adlandırılıb. 

Əfsanəvi qala bir müddət əvvələ kimi suyun altında olub və sahildən 350 metr aralıda yerləşib. 70 santimetr uzunluğunda və 25-50 santimetr enində olan daş plitələr 1939-cu ildə arxeoloji ekspedisiya zamanı aşkar edilib. Arxeoloqlar qalanın bir hissəsini quruya çıxarıb, onlar hazırda “Şirvanşahlar sarayı” muzeyində saxlanılır. 

Dənizin dibindən üzərində heyvan, bitki təsvirləri və ərəb əlifbası ilə yazılar olan 706 plitə çıxarılıb. Daşlardan birinin üzərində qəsri tikən şirvanşahın təsviri əks olunub. 

Qala Zeynəddin ibn Əbu Rəşid Şirvaninin layihəsi əsasında tikilib. Bayıl qəsrinin adanın biçiminə uyğun uzunsov planı var. Qalanın uzunluğu 180 m, orta eni isə 40 m-dir. Qala divarları şərqdə altı, qərbdə isə beş yarımdairəvi bürclə möhkəmləndirilib. Qalanın divarlarının qalınlığı 1,5-2 metrdir və burada 15 qüllə var ki, onlardan üçü dairəvi, 12-si isə yarımdairəvi olub. 

Ə.Ş.
www.oxu.az