Yol qəzaları ilə bağlı vahid çağrı mərkəzi yaradılacaq

Azərbaycanda yol qəzaları ilə bağlı vahid çağrı mərkəzi yaradılacaq.

Oxu.Az-ın məlumatına görə, bu barədə məlumat “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün” Dövlət Proqramında yer alıb.

Sənədə əsasən, yol-nəqliyyat hadisələri ilə bağlı xilasetmə, təcili və təxirəsalınmaz tibbi yardım tədbirlərini həyata keçirən aidiyyəti qurumlar arasında əlaqələndirmənin gücləndirilməsi, vahid çağrı mərkəzinin yaradılması, yol-nəqliyyat hadisələrinin qeydiyyatı sisteminin və ilk tibbi yardım göstərilməsi işinin təkmilləşdirilməsi, yol-nəqliyyat hadisələrinin müntəzəm baş verdiyi yerlərin – qəza ocaqlarının müəyyən edilməsi və qəzaların səbəblərinin aradan qaldırılması işinin təkmilləşdirilməsi nəzərdə tutulub.

Həmçinin təhlükəsiz yol hərəkəti iştirakçıları – yol hərəkəti iştirakçılarının təhlükəsiz davranışının təmin edilməsi, təhlükəsizlik vasitələrindən istifadə ilə bağlı davamlı təbliğat, təşviqat və maarifləndirmə işi aparılması, uşaqların yollarda qorunması, sürücülərin hazırlanması və ixtisasının artırılması, yol hərəkəti təhlükəsizliyinin təmin edilməsində ictimai iştirakçılığın təşkili də nəzərdə tutulub.

İlhamə Əbülfət