Akademik: İnsanların çoxu növbə gözləyə-gözləyə həyatlarını itirirlər
Akademik: İnsanların çoxu növbə gözləyə-gözləyə həyatlarını itirirlər
Orqan transplantasiyasına ehtiyacı olan insanların çoxu növbə gözləyə-gözləyə həyatlarını itirirlər.
Oxu.Az-ın xəbərinə görə, bunu Milli Məclisin (MM) qarşıdan gələn 2019-cu il yaz sessiyası ilə bağlı parlamentin Səhiyyə komitəsinin ilk iclasında çıxışı zamanı adıçəkilən komitənin sədri, akademik Əhliman Əmiraslanov deyib.
Ə.Əmiraslanov hesab edir ki, bununla bağlı mövcud qanunvericilik aktında ciddi dəyişikliklərə ehtiyac var:
“Meyitdən orqan və toxumanın götürülməsi həmin qanun layihəsində öz əksini tapmayıb. Bu da transplantasiyanın əsasını təşkil edir. Hesab edirik ki, bununla bağlı yeni qanun olsa, daha yaxşı olar. Məsələ ilə əlaqədar İşçi Qrupu yaradaq. Bu gün cəmiyyətin bu qanuna böyük ehtiyacı var. Bu qanun orqan transplantasiyasına ehtiyacı olan insanların işlərini də rahatlaşdırar. Orqan transplantasiyasına ehtiyacı olan insanların çoxu növbə gözləyə-gözləyə həyatlarını itirirlər”.
Ə.Əmiraslanov qeyd edib ki, qaraciyər transplantasiyası ilə bağlı mühüm işlər görülür:
“Ürək transplantasiyası işinə hazırlaşırlar, amma nə qədər ki meyitdən orqan götürülməsinin hüquqi əsasları həll olunmayacaq, bu məsələlər düyün nöqtəsindən tərpənməyəcək”.
Kamil HƏMZƏOĞLU