Azərbaycanda məmurun evinə basqın edən şəxs hakim qarşısına çıxarılır

Quldurluq etməkdə təqsirləndirilən Vüsal Rəsulovun cinayət işi yenidən məhkəməyə göndərilib. 

Oxu.Az xəbər verir ki, cinayət işinə baxılması üçün Gəncə Ağır Cinayətlər Məhkəməsinə göndərilib. 

İş hakim Nural Əliyevin icraatına verilib. 

Qeyd dək ki, hadisə ötən ilin noyabr ayında baş verib. Qazax şəhərinin Bakı küçəsində yerləşən evə basqın edən maskalı şəxs ev sahibi Fəranə Məmmədovaya bıçaqla hədə-qorxu gələrək onun qızıl üzüyünü, brilyant qaşlı sırğalarını və 50 manat nağd pulunu alaraq ərazidən uzaqlaşıb.

İş üzrə zərərçəkmiş 2017-ci ilədək Qazax Rayon İcra Hakimiyyətinin başçısının müavini olmuş Fərman Nağdaliyevin həyat yoldaşıdır. 

V.Rəsulova Cinayət Məcəlləsinin 181.2.3-cü, (yaşayış sahəsinə qanunsuz olaraq girməklə quldurluq) 181.2.5-ci (silah və ya silah qismində istifadə edilən əşyalar tətbiq edilməklə quldurluq) və 228.4-cü (qanunsuz silah gəzdirmə) maddələri ilə ittiham verilib. 

Onu da xatırladaq ki, bu iş ibtidai istintaq başa çataraq Gəncə Ağır Cinayətlər Məhkəməsinə göndərilmişdi. Məhkəmənin hazırlıq iclası işi yenidən ibtidai istintaqa qaytarmışdı.