“Qəbələ” “Səbail”lə oyunda əzmkar qələbə qazandı - VİDEO

Futbol üzrə Azərbaycan Premyer Liqasında bu gün XVI turun daha bir oyunu keçirilib.

“Report”un məlumatına görə, günün ilk matçında “Qəbələ” “Səbail”i qəbul edib.

Oyunda hesabı qonaqlar açıblar. Qarşılaşmanın 4-cü dəqiqəsində Luvaqqa Kizito erkən qolla “Səbail”i hesabda önə çıxarıb.

“Qəbələ” 35-ci dəqiqədə status-kvonu bərpa edib. Fares Abu Akel dəqiq oynayıb.

İlk hissə bərabərliklə yekunlaşıb.

İkinci hissədə daha bir qol vuran meydan sahibləri matçı qələbə ilə başa vurublar. Ruan Renato 63-cü dəqiqədə komandasına qələbə qazandıran qola imza atıb.

Bu nəticə ilə xallarının sayını 24-ə yüksəldən “Qəbələ” turnir cədvəlinin 4-cü pilləsinə yüksəlib. “Səbail” isə 10 xalla 8-cidir.

Qeyd edək ki, turun açılış oyununda dünən “Qarabağ” “Neftçi”ni 4:0 hesabı ilə məğlub edib.

Bu gün isə saat 17:00-da başlayan görüşdə hazırda “Sabah” – “Şamaxı” ilə oynayır.

Tura dekabrın 4-də “Kəpəz” – “Sumqayıt” və “Zirə” – “Turan Tovuz” matçları ilə yekun vurulacaq.