Azərbaycanda orqan transplantasiyasını gözləyən neçə xəstə var? - AÇIQLAMA

“Donorlar anonim saxlanılır. Bu, bütün dünyada belədir. Meyit donordan orqan götürüldükdə donorun ailə üzvləri və qohumları götürülən orqanların kimə verildiyini qətiyyən bilmir. Bu məsələlər tam məxfi saxlanılır”.

Oxu.Az xəbər verir ki, bu fikirləri Səhiyyə Nazirliyinin rəsmi “Instagram” səhifəsindəki canlı yayım zamanı Orqan Donorluğu və Transplantasiyası üzrə Koordinasiya Mərkəzinin idarə heyətinin sədri Yeganə Abbasova deyib.

Həkim qeyd edib ki, bu gün Azərbaycanda orqan transplantasiyasını gözləyən 500-ə yaxın xəstə var. 

Həkim orqan idxalı və ixracı ilə bağlı məsələyə də aydınlıq gətirib:

“Bu o zaman həyata keçiriləcək ki, meyit donorlardan orqan çıxarılmağa başlayacaq. Azərbaycan Respublikasında meyitdən çıxan orqana uyğun resipiyent yoxdursa, başqa ölkələrdən orqan istəyə biləcəyik. Əsas biz ölkəmizdə gözləmə siyahısına baxacağıq. Bizdə ehtiyac olmadığı təqdirdə orqan transplantasiyası ilə bağlı qarşılıqlı müqaviləmiz olan ölkələrə həmin orqanı ixrac edə biləcəyik. Eyni zamanda o ölkələrdən də eyni qaydada resipiyent olmayan orqanların Azərbaycan idxalı həyata keçirilə biləcək”.

Könül Cəfərli