“Formula-1” komandası rəsmisi: Bakıdakı trass bizim üçün çətindir
“Formula-1” komandası rəsmisi: Bakıdakı trass bizim üçün çətindir
“Formula-1” yarışının komandalarından olan “Racing Point”in texniki direktoru Endryu Qrin Bakıda zəif nəticə göstərəcəklərini etiraf edib.
O, “Autosport”a açıqlamasında bildirib ki, yalnız 10-12 mayda keçiriləcək İspaniya Qran-Prisində var gücləri ilə çıxış edəcəklər.
“Tətbiq etdiyimiz yenilikləri get-gedə optimallaşdırırıq. Bəhreyn yarışı bizə maşınımızın yaxşı yerlərini göstərdi. Bakıdakı trass həmişə bizim üçün çətin olub. Bu il də yenidən onun çətin olacağını güman edirəm.
Biz Bakıda xüsusi aşağı qüvvəli bolidlə çıxış edəcəyik. Sonra isə bizim çoxlu və sürətli yeniliklərimiz olacaq. İspaniyada bunlara başlayacağıq”.
Qeyd edək ki, indiyədək üç Qran-Pri baş tutub. Avstraliyadakı yarışda finlandiyalı Valteri Botas, Bəhreyn və Çində isə britaniyalı Luis Hamilton qalib olub.
Səbuhi MUSAYEV