Avropa çempionatında uğur qazanmış güləşçilərimiz artıq Bakıdadır - FOTO/VİDEO

İtaliyanın paytaxtı Romada keçirilən Avropa çempionatında uğurlu çıxış edən Yunan-Roma güləşi üzrə Azərbaycan yığması gecə saatlarında Bakıya qayıdıb.

Oxu.Az xəbər verir ki, Heydər Əliyev adına Beynəlxalq Hava Limanında iki qızıl və dörd bürünc medalla rekord müəyyənləşdirən, eyni zamanda, komanda hesabında ikinci yeri tutan millimizin qarşılanma mərasimi keçirilib.

Komandanı Azərbaycan Güləş Federasiyasının (AGF) baş katibi Orxan Məmmədov və federasiyanın vitse-prezidentləri Elçin Cəfərov, Firdovsi Umudov, güləşçilərin yaxınları, idman ictimaiyyətinin tanınmış simaları və media nümayəndələri qarşılayıb.

Azərbaycan millisi tarixində ilk dəfə Avropa çempionatında altı medal qazanaraq rekord nəticə göstərib.

Sənan Süleymanov (77 kq) və Rafiq Hüseynov (82 kq) rəqiblərinə qalib gələrək, fəxri kürsünün ən yüksək pilləsinə qalxıblar. Eldəniz Əzizli (55 kq), Murad Bazarov (60 kq), Ülvi Qənizadə (72 kq) və İslam Abbasov (87 kq) isə üçüncü yeri tutub.

2 qızıl və 4 bürünc medal qazanan yığmamız 116 xal toplayaraq, komanda hesabında Rusiyadan (128) sonra ikinci olub. Türkiyə isə 90 xalla üçüncü pillədə qərarlaşıb.

Azərbaycan Güləş Federasiyasının (AGF) Yunan-Roma güləşi üzrə vitse-prezidenti Elçin Cəfərov bütün güləşçilərdən qızıl medal gözlədiyini bildirib: “Təbii ki, bütün güləşçilərimizdən qızıl medal gözləyirdik, lakin bu, idmandır. Hər an hər şey ola bilər. Prezident İlham Əliyevin və I vitse-prezident Mehriban Əliyevanın komandamızı təbrik etməsi bizi çox sevindirdi. Düşünürəm ki, bu, yığma komandamıza və eləcə də, ayrı-ayrılıqda bütün komanda üzvlərinə verilən ən yüksək qiymətdir. Qarşıda yığma komandamızı iki mötəbər yarış gözləyir. Martın 19-22-də və eyni zamanda, 30 aprel – 3 may tarixlərində Olimpiya təsnifat turnirləri keçiriləcək. İnanıram ki, medal qazana bilməyən idmançılarımız mübarizədən nəticə çıxaracaq və biz Tokio Yay Olimpiya Oyunlarına olan lisenziyaları uğurla əldə edəcəyik”.

Millimizin baş məşqçisi Aleksandr Tarakanov isə bunları deyib:

“Komandanın çıxışından çox razı qaldım. Fikrimcə, Avropa çempionatında iki qızıl, dörd bürünc medal qazanmaq çox yaxşı nəticədir. Nəzərə alaq ki, bizim üçün əsas lisenziya turnirləri sayılır. Çünki Olimpiadaya bacardığımız qədər çox vəsiqə əldə etməliyik. Bunun üçün əlimizdən gələni edəcəyik. Fürsətdən istifadə edib AGF-nin rəhbəri Namiq Əliyevə dərin minnətdarlığımı bildirirəm. Çünki o komandanın bütün ehtiyaclarının qarşılanması və yüksək səviyyədə təlim-məşq toplanışlarının təşkili üçün əlindən gələni əsirgəmir. Biz də çalışacağıq ki, bizə yaradılan bu şərait fonunda etimadı tam doğruldaq”.

Qızıl medalçı Sənan Süleymanov əsas hədəfinin erməni idmançıları məğlub etmək olduğunu deyib: “Heç gözləmədiyim anda çempion oldum. Ən çətin görüş ilk görüş idi. Bolqarıstanı təmsil edən erməni əsilli idmançını məğlub etdim. Yarımfinal mübarizəsində də erməni güləşçisini məğlub edərək finala yüksəldim. Final mərhələsində özümə inamım çox idi və istədiyim nəticəni əldə edə bildim. Ölkə başçısı İlham Əliyevin və I vitse-prezident Mehriban Əliyevanın bizi təbrik etməsi çox böyük dəstək idi və bu, qarşıdakı yarışlarda böyük motivasiya olacaq. Gələcəkdə də həm Olimpiya çempionatında, həm də dünya çempionatında uğurlu nəticə göstərərək bayrağımızı dalğalandırmağı hədəfləyirəm”.

Digər qızıl medalçı Rafiq Hüseynov isə gənc idmançıların Avropa çempionatında çox uğurlu nəticə göstərdiklərini qeyd edib: “Yığma komandamızda çox uğurlu gənc idmançılar mübarizə aparırdı və ilk növbədə onların adına çox sevinirəm. Öz adıma da sevinirəm ki, yenidən nəticəmi təkrarlaya bildim. İstənilən yarışlara hazırlıq çətin keçir. Bütün məşqlərimiz və eləcə də mübarizələrimiz gərgin keçirdi. Çünki Avropa çempionatına qatılan idmançıların hər biri ölkədə seçilən güləşçilər olur. Buna görə də Avropa çempionatına hazırlıq məşqləri də digər yarışlardan bir qədər çətin olur”.

Avropa çempionatına isə fevralın 16-da yekun vurulacaq. Bu gün qadın güləşçilərin də mübarizəsi yekunlaşacaq, həmçinin sərbəst güləşçilər yarışa qoşulacaqlar.

Kamil Əmirli