21 
May
2020
12:50
92
64
1241
Virtual karabakh

Azərbaycan və Gürcüstan birgə 20 min avroluq turnir keçirəcək

Gənclər və İdman Nazirliyi, Azərbaycan Şahmat Federasiyası (AŞF), Gürcüstan Şahmat Federasiyası (GŞF), eləcə də, SOCAR-ın təşkilatçılığı ilə internet üzərində şahmatın blits növü üzrə beynəlxalq turnir keçiriləcək.

Oxu.Az xəbər verir ki, Beynəlxalq Şahmat Federasiyasının (FIDE) vitse-prezidenti Mahir Məmmədovun təşəbbüsü ilə 26-28 may tarixlərində Azərbaycanda “Respublika Günü”, Gürcüstanda isə “Müstəqillik Günü”nə həsr edilən “İpək Yolu Kuboku” uğrunda yarış təşkil ediləcək. 

Yarışın keçirilməsində əsas məqsəd Azərbaycan və Gürcüstanda bayram günlərində iki ölkə arasında idman əlaqələrinin inkişafı, pandemiya dövründə şahmatçıların oyun praktikasının saxlanılması, eləcə də, şahmatın təbliğidir.

Yarış playchess.com virtual oyun platformasında keçiriləcək. Turnirdə ümumilikdə 50 iştirakçı olacaq. “İpək Yolu Kuboku”nda AŞF və GŞF tərəfindən FIDE əmsalına görə (01.05.2020 tarixinədək) kişilərdə ilk 12, qadınlarda ilk 8 şahmatçı və 16 yaşa qədər gənclər arasında (01.01.2020 tarixinədək 16 yaşı tamam olmamış) ilk üç şahmatçı mübarizə aparacaq.

Federasiyalar yarışa “wild card” ilə iki şahmatçı dəvət etmək hüququna malikdir.

Yarışın ümumi mükafat fondu 20 min avrodur. Turnirdə mübarizə aparacaq bütün şahmatçılar göstərdikləri nəticəyə müvafiq olaraq pul mükafatı qazanacaq. İsveçrə sistemi üzrə təşkil olunacaq yarış 15 turdan ibarət olacaq.

Nəzarət vaxtı hər bir şahmatçıya oyunun sonuna qədər üç dəqiqə və birinci gedişdən başlayaraq, hər gediş üçün iki saniyə əlavə olmaqla müəyyən edilir. I-VII turlar mayın 26-sı saat 15:00-da, VIII-XV turlar mayın 28-i saat 18:00-da başlayacaq.

Bizimlə əlaqə saxlayın

Digər İdman xəbərləri