27 
İyn
2020
13:17
147
43
6068
Virtual karabakh

“Neftçi”nin veteran futbolçusu: “Çindən müxtəlif mallar gətirirəm” - MÜSAHİBƏ

Bu gün “Neftçi”nin veteran futbolçusu Nikolas Kanalesin 35 yaşı tamam olur. 1985-ci ildə dünyaya gəlmiş çilili hücumçu 2012-2013, 2014-2015, 2016-cı illər ərzində “Neftçi”nin heyətində çıxış edib. 2013-cü ildə Azərbaycan çempionatının qalibi və bombardiri olmuş Kanales elə həmin ildə ölkə kubokunu başı üzərinə qaldırıb.

Oxu.Az xəbər verir ki, futbolçu “Neftçi”nin rəsmi saytına müsahibə verib.

– Nikolas, doğum gününüz mübarək! Bilirik ki, pandemiya Çilidən də yan ötməyib. Necəsiniz?

– Çox sağ olun, təşəkkür edirəm! Bəli, təəssüf ki, pandemiya bütün dünyanı ağuşuna alıb və bu, çox üzücüdür. Çilidə aprel ayından etibarən karantin rejimindəyik. İnsanlar normal işləyə, yaxınları ilə görüşə bilmirlər. Düşünürəm ki, tezliklə hər şey əvvəlki vəziyyətinə qayıdacaq.

– Artıq karyeranızı başa vurmusunuz və geri boylanıb bunu dəyərləndirə bilərsiniz. Hesab edirsinizmi ki, daha çox şeyə nail ola bilərdiniz?

– Ümumi baxanda karyeramın ilk günlərindən sonuna kimi xoşbəxt anlar yaşamışam. Buna görə çox sevinirəm. Çilinin böyük klublarında oynamışam, milli komandaya dəvət almışam. 15 illik peşəkar karyeramın altı ilini Avropa klublarında, həmin ölkələrin güclü komandalarında keçirmişəm.

Yaşıma görə hələ də oynaya bilərdim, amma karyeramın son ilində çox ciddi zədə aldım. Düzdür, çətinliklə də olsa, zədəmi sağaltdım. Hətta sonradan bir neçə Avropa klubundan təklif də gəldi. Amma maliyyə tərəfdən razılığa gəlmədiyimizə görə karyeramı bitirdim. Artıq şəxsi biznesimlə məşğulam.

– Azərbaycanda karyeranızın bu qədər uğurlu alınacağını təsəvvür edərdiniz?

– Ümumiyyətlə, karyeram boyu həmişə istədiklərimə nail olmağa çalışmışam və nail olmuşam. “Neftçi”nin heyətində də çempion və bombardir olmağa cəhd etmişəm. Xoşbəxtlikdən, komanda yoldaşlarım güclü futbolçular olublar ki, bunun da sayəsində məqsədimə çatmışam.

– Ümumiyyətlə, “Neftçi” sizə nə verib?

– “Neftçi”də özümü evimdəki kimi hiss edirdim. Vətəni tərk edib, legioner həyatı yaşamaq asan olmur. Buna baxmayaraq, “Neftçi”də uyğunlaşma prosesi çox tez keçdi. Yeni dostlar qazandım. Adət-ənənələrinizdən, ləziz yeməklərinizdən məmnun qaldım. “Neftçi” mənə böyük ad qazandırıb.

– “Neftçi”nin heyətində keçirdiyiniz oyunlardan ən vacibləri hansılardır? Ən vacib qol hansı olub?

– “Qarabağ”la “Tofiq Bəhramov” stadionunda keçirdiyimiz oyun çox vacib idi. Matçın sonlarına yaxın Vobayın ötürməsindən sonra cərimə meydançasının kənarından gözəl zərbə ilə komandamızın ikinci qolunu vurdum.

Nəticədə, qələbə qazanaraq, əsas rəqibimizi 4-5 xal geridə qoyduq və bununla da, çempionluğu təmin etdik. Bundan əlavə, Milan “İnter”i ilə keçirdiyimiz oyunlar və həmin vaxt vurduğum qol karyeramda ən vaciblərdəndir.

– “Neftçi”nin oyunlarını izləyə bilirsinizmi?

– Bəzi matçları internet vasitəsilə izləməyə çalışıram. “Neftçi”ni həmişə zirvədə görmək istəyirəm.

– Məşqçi olmaqla bağlı planlarınız var, yoxsa futbolla həmişəlik vidalaşmısınız?

– Artıq iki ildir şəxsi biznesimi qurmuşam. Buna görə də futboldan ayrılmağım çətin olmadı. Tez-tez Çindən Çiliyə müxtəlif məhsullar gətirirəm. Hələ də dəvətlər alıram, amma artıq il yarımdır oynamıram və əminliklə deyə bilərəm ki, futbolla həmişəlik vidalaşmışam.

– Siz “Neftçi”nin və Azərbaycan futbolunun tarixində qızıl iz qoymusunuz. Təbii ki, həmişə azarkeşlərin xoş sözlərlə xatırlayacağı insan olacaqsınız. Onlara nə demək istərdiniz?

– Sevgi, qayğı və diqqət məni həvəsləndirən amillərdəndir. İstər Bakı küçələrində, istər stadionlarda insanlardan, azarkeşlərdən böyük hörmət görmüşəm. Tribunalarda adım səslənəndə böyük zövq alırdım, oynamaq həvəsim daha da artırdı.

Fürsətdən istifadə edib, mənə göstərilən sevgiyə və diqqətə görə hər bir “Neftçi” azarkeşinə səmimi qəlbdən təşəkkürümü bildirirəm. Onlarla qürur duyuram və hər birinə qucaq dolu salam göndərirəm.

Bizimlə əlaqə saxlayın

Digər İdman xəbərləri