Azərbaycan taekvondoçuları bu gün də medal qazana bilmədilər - YENİLƏNİB
Azərbaycan taekvondoçuları bu gün də medal qazana bilmədilər - YENİLƏNİB
Azərbaycan taekvondoçuları Bakıda keçirilən dünya çempionatında bu gün də medal qazana bilməyiblər.
Oxu.Az xəbər verir ki, Eltac Qafarov 1/4 finala qədər irəliləsə də, bundan artığına gücü çatmayıb. 74 kq çəki dərəcəsində çıxış edən idmançı 1/16 finalda monteneqrolu Vasiliy Peruniçiçi, 1/8-də norveçli Sebastian Tuneni mübarizədən kənarlaşdırıb. Lakin o, yarımfinala vəsiqə uğrunda qarşılaşmada Marko Qolubiçə uduzub.
Qadınların yarışında 62 kq-dakı Fatimə Məcidova isə 1/16 final mərhələsində Kristina Kaspaya (İtaliya) məğlub olub.
Qeyd edək ki, daha əvvəl Azərbaycanın 9 təmsilçisi medalsız qalıb.
09:52
Bakıda taekvondo üzrə dünya çempionatı davam edir.
Oxu.Az xəbər verir ki, bu gün Azərbaycanın daha iki taekvondoçusu dünya çempionatında mübarizəyə başlayacaq.
74 kq çəki dərəcəsində yarışan Eltac Qafarov 1/32 finalda Vasilliy Peruniçiç (Çernoqoriya) - Çarlill Mersyer (Kanada) duelinin güclüsü ilə qarşılaşacaq.
Qadınların yarışında 62 kq-dakı təmsilçimiz Fatimə Məcidova 1/16 final mərhələsində Kristina Kaspa (İtaliya) - Kiem Bak Ti (Vyetnam) cütünün qalibi ilə üz-üzə gələcək.
Qeyd edək ki, daha əvvəl Azərbaycanın 9 təmsilçisi medalsız qalıb.
Dünya çempionatı iyunun 4-də başa çatacaq.