Türkiyəyə uçuşların sayı üç dəfə artırıldı
Türkiyəyə uçuşların sayı üç dəfə artırıldı
Bakıda Azərbaycan Respublikasının Nəqliyyat, Rabitə və Yüksək Texnologiyalar Nazirliyi yanında Dövlət Mülki Aviasiya Agentliyi ilə Türkiyə Respublikasının Mülki Aviasiya Baş Direktorluğunun nümayəndə heyətləri arasında görüş keçirilib.
Oxu.Az xəbər verir ki, görüşdə hər iki ölkənin aviaşirkətlərinin nümayəndələri iştirak edib.
Görüş zamanı iki qardaş ölkə arasında hava əlaqəsinin liberallaşdırılması məsələsi müzakirə edilib. Aparılmış danışıqlar nəticəsində tərəflərin ərazisindəki şəhərlərarası sərnişin reyslərinin sayı təxminən üç dəfə (həftədə 45 reysdən 127 reysədək) artırılıb.
Uçuş hüququ Azərbaycan Respublikasının və Türkiyə Respublikasının bütün aviaşirkətlərinə şamil ediləcək.
Bundan əlavə, tərəflər “Hava əlaqəsi haqqında” yeni saziş layihəsinin müzakirəsinə başlamaq barədə razılığa gəliblər.
Həmin saziş imzalandıqdan sonra qüvvədə olan 1992-ci il 2 may tarixli “Hava Nəqliyyatı haqqında Hökumətlərarası Saziş”i əvəz etməlidir.